Abantu bokuza abadabuka eZimbabwe, kwele Mozambique, eMalawi lakwamanye amazwe, ikakhulu abatshayela izimota ezithwala impahla labenza imisebenzi yokwakha, bathwaliswe nzima yizizalwane zakwele South Africa eThekwini ezithi kabasabafuni elizweni labo ngoba bathatha imisebenzi yonke.
Ukuxokozela lokhu okuqalise ngeSonto kuqhubekela phambili endaweni ezinjenge Sydenham lapho okulabantu bokuza abacatshangela ukuthi bedlula ikhulu abacine besiyacatsha enkambeni yamapholisa kulandela ukuhlaselwa kwabo emadabukakusa namuhla ngabantu akade bethwele amahloka, ingqamu lezinye lokunye.
Abadabuka eZimbabwe abaxoxe leStudio 7 bathi inengi labo selithithibele ngokwenzakala eThekwini okunjengalokhu okwake kwenzakala kuleyondawo kuze kubulawe abantu bokuza. Kasenelisanga ukukhuluma ngodaba lolu leziphathamandla zikahulumende wakwele South Africa kanye lamapholisa.
Omunye wababone okuxokozela lokhu, UMnu. Teddy Nyoni, uthi kuyethusa okwenzakala eThekwini.
UNyoni uthi abanye abantu bokuza sebethethelwa impahla yizizalwane zakwele South Africa.
Kuleziphathamandla zebandla elibusayo eleAfrican National Congress ezithi abantu bokuza badala amacala amanengi kwele South Africa. Bethula lokhu ngesikhathi ilizwe lilungiselela ukhetho olukhulu.
