Ikhansili yakoBulawayo isiqalile uhlelo lokuvala amanzi okwensuku eziyisithupha,
Lokhu kutsho ukuba izakhamizi zizathola amanzi kanye kuphela ngeviki.
Emizameni yokucongolozela amanzi, ikhansili isiqalile njalo ucwaningo lokuhlambulula amanzi awedamu leKhami ngesikhathi belinde ukuphela kokwakhiwa kwedamu leGwayi-Shangani kanye lemigodi yamanzi eseNyamandlovu lobanje uzulu eseqalile ukukha amanzi kumachibi asedolobheni angahlanzekanga ngenxa yodubo lokusilela kwamanzi.
Umanisiphala wakoBulawayo wazise njalo ukuba usemise uhlelo lokudonsa amanzi edamu leLower Ncema ngenxa yokuthi asetshile amanzi kuleyo ndawo.
UNkosikazi Nesisa Mpofu, isikhulumi sekhansili yedolobho lakoBulawayo, uthi bazama ngamandla wonke ukuthi uzulu angacini engaselamanzi.
“Sesingezelele amahola ezivalela khona uzulu amanzi kulandela ukusilela kwamanzi edolobheni. Amanzi asezabuya kuzulu kanye ngeviki ukuze amanzi esilawo asifikise kusikhathi esizayo sezulu sicela uzulu alondoloze amanzi. Amanzi aku29.9 percent full.”
UNkosikazi Mpofu uqhubeke ethi sebethe bama ukukha amanzi kuLower Ncema ngoba selomile idamu leli.
''Idamu leLower Ncema sicine ukulisebenzisa kuviki ephelileyo ngoba amanzi akuleli idamu asemancane kakhulu. Amadamu esiwasebenzisayo nguInsiza, Mayfair, Inyankuni loMtshabezi. Amadamu abalisa iLower Ncema, Upper Ncema loMzingwane asisisakhi kuwo amanzi. Okwamanje amadamu ethu aku 29,9 percent full.
Emizameni yokulwisana lodubo lokusilela kwamanzi ikhansili yedolobho isisungule uhlelo lokuzama ukuthi badinge ulwazi lokuhlambulula amanzi awedamu leKhami.
“Ikhami Dam lidamu lakoBulawayo esingalisebenzisiyo kodwa ngesikhathi sezulu liba lamanzi njalo ngamanzi angasetshenziswa njengekhansili siphakathi kokwenza ucwaningo ukuthi ahlanzwe asetshenziswe. Sesilinde abacubunguli ukuba baze bazohlola ukuthi lamanzi angahlanjululwa njani asebenze futhi. Ngemva kocwaningo silakho ukuthi sazi ukuba nyathela bani esingalithatha. Amanzi la alakho ukusetshenziswa kumafekithali ethu asebenzisa amanzi ahlanzekileyo manje ukuze ahlambulekileyo abe ngawokunatha ezindlini. Asikaqalisi ukuhlambulula amanzi sitholiswe imali libhanga le AFDB ukuze siqhube ucwaningo lolu.”
Isakhamuzi semzini weNkulumane koBulawayo, uNkosikazi Linda SIbanda, uthi sebebhekane lobunzima obumangalisayo ngokudinga amanzi.
“Udubo lokusilela kwamanzi lunzima asazi ukuthi singancediseka njani. Ukungabi lamanzi kubuhlungu sekubangela ukudala imikhuhlane sivele sibhekane leCOVID edinga ukuba abantu behlale begeze izandla okuyinto inengi alisakulandeli. Abantu baphilanzima abalazitsha zokugcinela amanzi kunzima. Kwezinye indawo amanzi ahamba kokuphela mtshokotsho sicela usizo singakangeni engozini.”
Usibalukhulu wakoBulawayo, uNkosikazi Judith Ncube, kuliviki ubike ukuba uhulumende watholisa leli dolobho imali yokulungisa imigodi yamanzi, izibholane zeNyamandlovu njalo uphakathi kokwakha idamu leGwayi-Shangani okulakho ukuqeda udubo lwamanzi edolobheni leli.
