Sokuqhamuke umkhuhlane weCOVID 9 ezikolo zeboarding eZansi yemaNdebeleni osokutshiye inengi labazali likhathazekile, lenhlanganiso zababalisi zisithi izikolo ezinengi bezivele zingalungelanga ukuvulwa.
Abafundi abedlula amakhulu amabili ezikolo ezigoqela eseTongwe High eBeitbridge, iBhulu High, Empandeni High lasePlumtree High ePlumtree batholakale belomkhuhlane weCOVID 19 osokutshiye inengi labazali likhathazekile ngokuvikeleka kwabantwababo lapho besezikolo.
Ezinye zalezi izikolo zilabafundi abafunda besuka emakhaya okungadala ukumemetheka komkhuhlane lo ezigabeni.
UMnu. Zwelithini Gabula oyisakhamuzi seSitezi uthi ukuhlangana kwabantwana ezikolo lapho zivulwa bevela endaweni ezitshiyeneyo kudale ukumemetheka kwalumkhuhlane.
Amazwi la asekelwe ngomunye njalo umzali uMnu. Collin Sibanda oyisakhamuzi seNtepe.
Umqondisi wenhlanganiso yababalisi eyeProgressive Teachers Union of Zimbabwe eZansi yemaNdebeleni UMnu. Urgent Moyo uthi izikolo ezinengi kazilungelanga ukuvulwa.
Umsekeli kamphathintambo wogatsha lwezemfundo uMnu. Edgar Moyo uthe inengi labafundi lisuke emakhaya livele seliphethwe ngumkhuhlane weCOVID 19.
Uthi izikolo kuzamele zilandele indlela zokuvikela lumkhuhlane ukuze ungamemetheki ngamandla.
Lanxa lumkhuhlane uqhubeka umemetheka ezikolo idale leCabinet libike kulivi ukuthi izikolo kazisoze zivalwe ngoba abafundi abaphethwe yilumkhuhlane bengatshengisele ukugula.
