Ikhomishini eqondisa umsebenzi wezokhetho eye Zimbabwe Electoral Commission ithi isiqalisile ukubhalisa kutsha abantu abalelungelo lokuvota phansi kohlelo olutsha lokuthatha imifanekiso yamehlo olwe biometrics.
Umngcinisihlalo weZEC, Nkosikazi Rita Makarau, utshele iphephandaba leHerald ukuthi abantu abafuna ukuvota kumele babhalise kuZEC.
UMakarau uthe okwamanje basalungisa imingcele yokuvota eyama constituencies ehambelana laleyo eyayivele ikhona.
Uthe uzulu kumele abhalise ngoba ukuvota kusetshenziswa ama biometrics okuzaqalisa ngomnyaka ozayo kuyabe kusenzelwa esigabeni lapho umuntu ahlala khona.
Uphinde wathi uhlelo lolu lukhangelelwe ukuthi luzathakazelelwa ngumuntu wonke eZimbabwe lalabo abajayele ukukhonona besithi ukuvota eZimbabwe akwenziwa ngemfanelo ngenxa yogwalo lokuvota olusetshenziswa khathesi olwe voters’ roll okukhanya lumanikiniki.
Amabandla aphikisa elibusayo athi iZEC kumele yenze uhlelo lolu ngemfanelo ukwenzela ukuthi wonke umuntu ofuna ukuvota angene kugwalo olujulileyo lwelizwe olokuvota.