Inhlanganiso ezimela izisebenzi zibika ukuba zibhekane lobunzima obukhulu ekusebenzeni kwazo, kubangelwa yimumo wezomnotho eZimbabwe osokubangela ukuthi izisebenzi zingenelisi ukuhlawula indingeko zazo zokuba ngamalunga kulezi nhlanganiso.
Unobhala jikelele wenhlanganiso yezisebenzi eyeFederation of Food and Allied Workers Union of Zimbabwe-FAWUZ uMnumzana Runesu Dzimiri uthi indubo zezomnotho elizweni sezibangele ukwehla okwesabekayo kwamalunga abo kubangelwa yikuxotshwa imisebenzi, ukwehliselwa iholo mahlayana kungela kuxoxisana lokuncitshwa kwe overtime osokubhahile.
Uthi konke lokhu sokubangela ukuba kube nzima ukuba bethole imali yokuqhuba umsebenzi wama union abo kakuhle.
UNkosikazi Maria Masango weyinye yalezi nhlanganiso uthi sokulenketha betshabi lakundlela izisebenzi eziphathiswa ngayo kungasafani lakudala:
UMnumzana Elijah Mutemeri wenhlanganiso ye ZCTU uthi udubo yikuba sokulokungenela kwabezombusazwe kudaba lwezisebenzi njalo kuhlolwa ukuba isisebenzi ngesaliphi ibandla lezombusazwe.
Uthi lokhu kwehlisa amandla alezi nhlanganiso okuvikela izisebenzi lapho zisephulelwa ilungelo lazo. Uthi amankampani amanengi akasenelisi ukubhadala izimali zama subscription kibo okuyinto ehlisa imali abazibuthanisa ngenyanga yokuqhuba inhlelo zalezi nhlanganiso.
Abezombusazwe yibo njalo ababikwa belomkhuba omubi wokungafuni ukubhadala izisebenzi kuhle. Unkosikazi Masango uthi kukhanya kusenziwa ngabomo ukuphazamisa ukusebenza kuhle kwenhlanganiso zabo.
Inhlanganiso eye Federation of Food and Allied Workers Union of Zimbabwe, ilamalunga agoqela, i-Baking Industry Workers Union, Food Processing Workers Union, Fish Poultry and Meat Abatour Workers Union, Grain Marketing Board Workers Union le Soft Drinks Manufacturing Workers Union lamanye.
Uhulumende we Zimbabwe yena walungisisa umthetho we Labour Relations Act esithi uvikela lokulwela amalungelo ezisebenzi elizweni kodwa ngokuxotshwa ngobunengi okwenziwe izisebenzi kunyanga ezimbili ezedluleyo, izisebenzi zithi lokhu akunjalo.