Abezempilakahle eZimbabwe bathi lokhu belalise esibhedlela seWilkins Hospital eHarare owesifazana osebenza edolobheni leWuhan kwele China obecatshangelwa ukuthi ulomkhuhlane weCoronavirus COVID-19.
Obona ngokunqabela ukumemetheka kwemikhuhlane kuhlangothi lwezempilakahle kuhulumende weZimbabwe, uDokotela Portia Mananganzira, uthi owesifazana olaliswe esibhedlela lesi ulakho ukuhlala kuleyo ndawo kuze kuyefika iviki ezayo ngoba bamelele ukubona inhlolisiso yegcikwane leCoronovirus eyenziwe kwele South Africa.
Ulensuku phose ezintathu esesibhedlela lesi. Wahanjiswa eWilkins Hospital esanda kufika eZimbabwe.
UDokotela Mananganzira uthi benze konke lokhu besenzela ukuba leqiniso lokuthi owesifazana lo kalagcikwane leCoronavirus njengalokhu okuvezwe yinhlolisiso yegazi lakhe eZimbabwe lakwele China.
“Sihambise okumele kuhlolwe eNational Institute of Communicable Diseases kwele South Africa. Bajayele ukuthatha amalanga amahlanu ukuba bahlole abakuphiweyo. Sizathola impumela yakhona ngoMvulo kumbe ngoLwesibili.
“Sizamkhupha esibhedlela kungatholakala ukuthi okuphume kunhlolisiso le kunjengalokhu okwabonwa zingcwethi zempilakahle eZimbabwe lakwele China. Nxa kungenzakala lokhu sizamhambisa ngekhaya sibesesihlala simbona sisenzela ukuthi kalagcikwane leCoronavirus. Sijayele ukwenza lokhu emantwini bonke abahamba endaweni esegcikwane leli.”
Abanye abantu abahlala eHarare bathi bakhathazekile ngomkhuhlane lo olakho ukubulala abantu abanengi ungaqhamuka elizweni.
Omunye wabo nguMnu. Peter Moyo, omele iSoutherton edale lephalamende, othi kungcono kuvinjwe ukwethekelelana kwabantu bakwele China labadabuka eZimbabwe.
