Abantu abafika ikhulu lamatshumi amabili endaweni ezitshiyeneyo ababhidlikelwe yimizi kulandela ukuna kwezulu lesikhukhula sebehlengwe luhlangothi lukahulumende olweCivil Protection Unit obeluncediswa libutho leZimbabwe.
Abantu laba besebehlala ehlathini kulandela ukuna kwezulu leli ngoMgqibelo, ngeSonto layizolo elibhidlize izindlu lakhukhula impahla lezifuyo zabantu eSenga, eChininga leNsunkwale eBinga.
UMnu. Prince Dubeko Sibanda, omele iBinga North edale lephalamende, uthi kabalaqiniso elokuthi kuhlengwe abantu bonke ngoba inkulu kakhulu indawo okune izulu leli lesikhukhula.
USibanda uthi bacela uhulumende lenhlanganiso ezizimele zodwa ukuba badingele abantu laba amatende, izigqoko lokudla.
Iziphathamandla zikahulumende zithi zizama ngamandla wonke ukuthi zidingele izakhamizi indawo yokuhlala lokunye abakuswelayo.
Kuke kwana izulu lesikhukhula eHwange, engcelelane leBinga, kwaba lempophoma zamanzi ezidilize izindlu lezinye izakhiwo.
