Sokubotshwe Abantu Abafika Phose 4,000 Abetheswa Icala Lokuzihlalisa Emhlabathini Kahulumende

Amapholisa athi asebophe abantu abazinkulungwane phose ezine, 3,775, abetheswa amacala okuzihlalisa emhlabathini kahulumende endaweni ezitshiyeneyo ezigoqela eGwanda, eMasvingo, eKaroi laseChipinge, okuyinto esisolwe kakhulu zinhlanganiso ezilwela amalungelo kazulu.

Isikhulumeli samapholisa uMnu Paul Nyathi wazise ngoLwesibili ukuthi asebetholakale yimithethwandaba belecala baphose bafike inkulungwane, 985.

Uhulumende ududula abantu laba emizini yabo esithi bazihlalisa kumbe bahlaliswa yizigilamkhuba ngaphandle komthetho ngesikhathi sokwabiwa kutsha komhlabathi owathathelwa abalimi abamhlophe phansi kohlelo lweLand Reform Program olwasungulwa ngomnyaka ka2000.

Inhlanganiso esezisole ukuxotshwa kwabantu lokhu zigoqela eyeIbhetshu Likazulu, Human Rights NGO Forum, eyeMasvingo Center for Research Advocacy and Development leyeZimbabwe Lawyers for Human Rights, yona esithumele amagqwetha endaweni ezitshiyeneyo ukuyamela abaxotshiweyo.

Unobhala jikelele weIbhetshu Likazulu uMnu Mbuso Fuzwayo utshele iStudio 7 ukuthi uhulumende wephula amalungelo oluntu ngokuxotshela abantu laba iganga engabaphi ezinye indawo zokuhlala.

Embed share

Ingxoxo loMnu Mbuso Fuzwayo

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:02:11 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala

Umphathintambo kahulumende obona ngokwabiwa komhlabathi lokulima uMnu Anxious Masuku ubengabambeki ecingweni, kodwa umsekeli wakhe uMnu Davis Marapira utshele iphephandaba leThe Standard ngeSonto ukuthi uhulumende kabuyeli muva ngaloluhlelo.