Abenhlanganiso yabosomabhizimusi amancane abakumsebenzi wokugaya impuphu, eyeSmall and Medium Millers Association, abahlomuka enhlanganisweni eyeGrain Millers Association (GMAZ), baveze ukuba kulabanye babo abathengisela umumbu kwele DRC ngentengo ephansi eyabe ibhadalelwe ingxenye nguhulumende.
Lokhu kuphume kuphenyo olwenziwa yikomidi yedale lephalamende ebona ngezokulima lokudingisisa imbangela yokusilela kwempuphu elizweni.
Omunye wamalunga enhlanganiso yabagaya impuphu, uMnu Wayne Brunt uveze ukuba udubo olukhona yikuthi kulomkhuba wenkohlakalo owenzakalayo emsebenzini wabo umumbu olentengo ebhadalelwe indleko nguhulumende ngohlelo lwamasubsidies, uthengiselwa kwele DRC ngamanye amakampani amakhulu.
“Ngifuna ukuba kulento ezimbi ezenzakala e GMB ukuba ngubani othola umumbu. Ngabona ukuba kulomumbu ohamba e DRC. Ukuba bathatha umumbu bewusa e DRC.”
Umnu Davies Muhambi owe United Milling utshele ikhomithi le ukuba waxotshwa enhlanganisweni yeGMAZ ngemva kokungavumelani labo kumbono wokungameli izifiso zamalunga kodwa ezamankampani amakhulu anjenge National Foods.
UMuhambi uqhubeke esithi uzimisele ukuveza inkohlakalo yonke eyenzakala elizweni emsebenzi wokutholakala komumbu lokugaywa kwempuphu elizweni.
Lokhu kusekelwe ngu Brant yena othe kabasela themba le GMAZ yikho bebumbe inhlanganiso emela osomabhizimusi abancane abagaya impuphu eye Small and Medium Millers Association.
Ingcwethi uMnu Masimba Kuchera uthi abathengisela impuphu phandle kwelizwe bakwenza befuna ukuthola ithuba lokudinga imali yakwamanye amazwe ngoba isilela elizweni.
“Indaba le itshengisa sobala ukuthi uhulumende laallaba abakafiki kubanga lokuvumelana. Bayabe bezama ukuthola imali yakwamanye ilizwe ukuze ibhizimusi labo liqhubekele phambili. Abanye babo ngabafuna ukudla imali nje”
Umkhokheli wenhlanganiso eyeGMAZ,uMnu. Tafadzwa Musarara uthe ebuzwa ngodaba lwenkohlakalo obe lukhulunywa ngabe Small and Medium Millers Association uthe okunengi kwakho ngamanga ajonge ukungcolisa igama lenhlanganiso yakhe ngakhoke bazachasisa lapho bephiwa ithuba lokukhuluma phambi kwedale lephalamende.
IStudio 7 ayenelisanga ukukhuluma lomphathintambo wezemali uMnu Mthuli Ncube loNkosikazi Sekai Nzenza umphathintimbo obona ngezamafekithali.
