Ukuthethwa kwecala lokuntshontsha izikhali enkambeni yamasotsha eletheswa uMnu Pascal Gwezere, oweMDC ekhokhelwa nguMnu Morgan Tsvangirai kuqhubekele phambili ngolweSine eHarare.
Igqwetha elimela uGwezere, uMnu Aleck Muchadehama ukhalaze emthethwandaba ukuthi umthoniswa avunyelwe ukuhlawula imali yesibambiso (bail) ukuze athoniswe esuka emzini wakhe.
Kodwa umtshutshisi uvimbe isicelo lesi esithi engakhululwa, uGwezere ulakho ukuphazamisa umsebenzi wamapholisa. Umtshutshisi uveze njalo ukuthi amapholisa sebophe abantu abane athi baphatheka loGwezere ekuntshontshweni kwezikhali lezi ePomona barracks.
Umahluli, uMnu Charles Hungwe uzakwethula isinqumo sakhe phezu kwaloludaba ngolweSihlanu. Kudaba olufanayo, ukuthethwa kwecala eletheswa uMnu Roy Bennett lakho kuqhubekele phambili eHarare High Court ngolweSine.
Amapholisa atshele umthethwandaba ukuthi alobufakazo obugcweleyo abunikwa nguMnu Peter Hitschmann obuveza ukuthi ngempela uMnu Bennett wayefuna ukugenqula uhulumende kaMongameli Mugabe.
Kodwa amagqwetha kaBennett akulandule lokhu, esithi okusobala yikuthi umsulwa kucala aletheswayo. Ukuthoniswa kwecala leli kuyaqhubeka ngoMvulo, kubike intatheli yethu uThomas Chiripasi.
