USikhwicamfundo Jonathan Moyo uthi kungamanga aluhlaza tshoko ukuba wadlwengula uNkosikazi Sipho Mazibuko ezithwele ngomnyaka ka2011.
UMoyo wethule imibiko eminenginengi enkundleni yeTwitter esithi akulasisindo okulotshwe liphephandaba leHerald elithi uNkosikazi Mazibuko wahambisa udaba lolu emapholiseni.
Iphephandaba leli libika ukuba uNkosikazi Mazibuko uthi uMoyo wamdlwengula ezithwele.
Kodwa uMoyo uthi kungamanga okukhulunywa nguNkosikazi Mazibuko, owake wamangalela ezinye njalo iziphathamandla zikahulumende esithi zamdlwengula eqhuba uhlelo lwakhe lweMiss Rural Zimbabwe.
UMoyo uthi kuyamangalisa okulotshwe liphephandaba leli njengoba engakaze ahlangane loNkosikazi Mazibuko.
Kubikwa ukuthi uNkosikazi Mazibuko wake wayahlolwa Engutsheni Hospital watholakala elomkhuhlane wengqondo. Wethulela udaba lolu iphephandaba leChronicle esithi kunengi okwenza wahanjiswa esibhedlela leso.
Amapholisa eZimbabwe athi akulamaphepha aveza ukuba uNkosikazi Mazibuko wamangala udaba lolu emapholiseni. UMoyo uthi konke lokhu kuveza ukuba uNkosikazi Mazibuko lokhu edinga uncedo lwabodokotela.