Uhulumende weZimbabwe uthi sekwenziwe okunengi okwethulwe ngumthetho omutsha weZimbabwe Democracy and Economic Recovery Act (ZIDERA) osanda kuguqulwa nguhulumende weMelika.
UMnu. Sibusiso Moyo, umphathintambo kahulumende obona ngokudlelana lamanye amazwe, uthi okunye abakwenzileyo kogoqela ukulandela imithetho yelizwe njalo lokulungisa ezomthetho.
Uthi bekumele uhulumende kamongameli Donald Trump esule izijeziso zenotho ezafakelwe abalandeli bebandla leZanu PF okwakuthiwa bephula ilungelo loluntu.
“I-ZIDERA ngumthetho olumigoqo okumangalisayo ngoba ilizwe le Melika lokhe livimba ukuthi ilizwe leli lithole imali ebolekwa ngamazwe atshiyeneyo. Loba kunjalo, ilizwe le Melika lizimisele ukuthi kubelokudlelana phakathi kwamazwe la.
“Umthetho lo uyakutsho ukuthi sokube lenguquko kwezomnotho elizweni njalo lokuthi kulabantu abanengi abavele kwele melika abakade bebona ukuthi siqhuba njani ukhetho. Longumthetho esingeke sawulandela ngoba ngumthetho welinye ilizwe.”
UMoyo uthi balandela umthetho weZIDERA. “Okunye okuvezwa ngumthetho lo sesikwenzile okunjengo kulandela imithetho yelizwe i-rule of law, kanye lokuthi abantu bakhululeke. Sesikwenzile konke lokhu.
“Ukuza kwabantu abavela kwele Melika ukuze hlolisisa ukuqhutshwa kokhetho ngokunye okwakufiswa lilizwe le Melika. Sibavumele ukuthi babuye kwele Zimbabwe.”
Kodwa-ke uNkosazana Thabitha Khumalo okubandla leMDC-T ekhokhelwa nguMnu. Nelson Chamisa uthi uMoyo usenga ezimithiyo.
Banengi abantu abakuhulumende webandla le Zanu PF abafakelwa izijeziso zenotho lilizwe leMelika kanye lamanye akuzwekazi leEuropean Union lele Australia.