Seliqongile inani labantu asebebulawa ngumkhuhlane woqhuqho, iMalaria, eGwanda South kulandela ukubhubha komunye owesifazana ohlala eKafusi-Pikinini otshonele esibhedlela seManama.
Lokhu kutsho ukuthi asebebulewe ngumkhuhlane lo eMatabeleland South sebeyisikhombisa.
Abogatsha lwezempilakahle bathi bakhathazekile ngokuqonga kwenani lalabo abahlaselwe luqhuqho eBeitbridge kanye leGwanda South lapho abantu abedlula inkulungwane lamakhulu amahlanu asebetholakale belomkhuhlane lo.
Umqondisi wezempilakahle eZansi yemaNdebeleni uNkosazana Rudo Chikodzore utshele umsakazo weStudio 7 ukuthi sebeyiskhombisa asebebulewe luqhuqho kulumhlubulo.
Ngokunjalo, uChikodzore uthi baphakthi kokuqoqa amambule okuvikela imiyane ukuze baphe labo abangelawo. Uthi baphakathi njalo kokufafaza imithi lapho okulamanzi ukuze kwenqatshelwe ukumemetheka kwemiyane.
Obhubhele eManama ngoLwesibili lo nguNkosikazi Edith Nkomo, obeleminyaka yokuzalwa engamatshumi amahlanu lasikhombisa.
Sixoxe lezibulo lakhe uPreety Sibanda ngesikhathi bezolanda isidumbu eManama, othe unina ugule phose okweviki esekhaya ngemva kokuthi ahanjiswe ekilinika ngoMvulo kuliviki.
“Sihambe laye ekilinika wafika watest iMalaria wasebanjwa iMalaria wahlatshwa ama injection angu 2 waginyiswa lamaphilisi angu 2 kwathiwa simhambise eManama wafika lakho watest iMalaria wabanjwa futhi iMalaria wabehlathwa ama injection angu 2 amanye wawahlatshwa ng1:00 ebusuku bamfaka lamadrip angu 4 wagcinwa sefakwe ku oxygen kuthiwa kasaphefumuli kuhle besithi kumbe iMalaria yakhona izakwehla but yagcina ingayehlanga kwasekusithi ngo 7:00 ekuseni wasesitshiya.”
Uzulu ukhathazakele ngokumemetheka kwalumkhuhlane, wona obungavamanga kulumhlubulo. Inengi elifana loMnu Ngqabutho Mpofu lithi likhathazekile ngohulumende okhanye egoqe izandla abantu besifa.
“Umkhuhlane woqhuqho kwelakithi emaNdebeleni usubhuqa, over 960 cases abantu asebebanjwe lumkhuhlane kodwa asikezwa uhulumende wakuleli lizwe ethatha inyathelo kasiboneni sizixhase sikhupheni khonalokhu okuncane esilakho sikuhlanganise sigijime siyexhasa abantu bakithi abadinga usizo.”
Abezempilakahle bakhuthaza uzulu ukuthi asebenzise amambule njalo agcobe lamafutha ahitsha imiyane ukuze azivekele kuqhuqho.
Inkuthazo le iza ngesikhathi kuvela ukuthi abanye bakhela inkukhu zabo izilugu ngamambule emiyane bengawaphiwa kuthi abanye Bagola ngawo inhlanzi kulokuthi bazivikele.
Abezempilakahle bathi njalo ukuphatheka emsebenzini yangaphandla efana lokugolwa kwamacimbi, ukwelusa izifuyo kanye lokwenjiwa kwegolide ngezinye zezizatho esezidale ukuqonga kwenani lalabo abahlaselwe yilumkhuhlane.
Kusenjalo umanisipala wedolobho leGwanda exhasane labosomabhizmusi kanye labezimayini lamhlanje basungulo uhlelo lokufafaza imithi ezitaladeni ukuze kwenqatshelwe ukumemetheka kwegciwane leCoronavirus.
Ekhuluma lapho kusungulwa loluhlelo umphathintambo obona ngokwenzakala eZansi yemaNdebeleni uMnu Abedinico Ncube ukhuthaze uzulu ukuba ahlale ezindlini ukuze kwenqatshelwe ukumemetheka kwalumkhuhlane.
“Liyakhuthazwa bantu khonalapha emadolobheni ukubana khonokhu elijayele ukukwenza lisiya emabhawa , abanye besenza amabhawa ezindlini akekume iCorona leyi ize iphele plus lokuhamba hamba lokha okwenzakalayo kungazabakhona umuntu kahambe sekulemfa lakho kufanele kwazakale ngamapholisa.”
Inani labahlaselwe ngumkhuhlane weCorona lalo liya liqonga mihla ngemihla elizweni lasemhlabeni jikelele.