EleZimbabwe selehlulekile ukuthola izicoco emidlalweni ye2020 Olympic Games kulandela ukunqotshwa kuka Scott Vincent emdlalweni we-golf ogqitshwe namuhla kwele Japan.
UScott, odlale ngcono namuhla kulalokhu akwenze kunsukwana ezedluleyo, ubekutshumi lasithupha – 16 phakathi kwabadlali abangamatshumi ayisithupha – 60 emdlalweni weMen’s Individual Golf Stroke Play.
Lokhu kutsho ukuthi abamele eleZimbabwe emidlalweni le, abagoqela uDonata Katai, Peter Gilpin, Peter Wetlzar loNgoni Makusha, behlulekile ukuthola izicoco zegolide, isiliva lebronze.
Abanye babo sebebuyele eZimbabwe.
Okhokhela abamele eleZimbabwe emidlalweni le, uFrederick Ndlovu, uthi bazamile kakhulu abadlali loba bengatholanga izicoco. Uthi abadlali laba balakho ukwenza kahle emidlalweni efanayo kwele France ngomnyaka ka2024.
Kusenjalo, uWinneth Dube, owaphatheka emidlalweni yeAthens Olympic Games ngomnyaka ka2004, uthi abadlali abangena emidlalweni yeOlympics bakuzinga eliphezulu emidlalweni yabo. UWinneth, laye ongatholanga isicoco emidlalweni le, uthi kumele eleZimbabwe liqhubekela phambili lihambisa abadlali emidlalweni yeOlympics.
