Iqula likaMongameli Jacob Zuma libuyelile eSouth Africa ngolweSibili ngemva kokukhuthaza amabandla akuhulumende womanyano ukuthi elungisise konke okuhluphayo ngokuphangisa.
Abazi ngokwenzalayo baveze ukuthi iqula leli lisuke liphethe ugwalo oluveza osokuvunyelwene phakathi kweZanu PF leMDC lokuthi kuyini okulokhu kuhlupha. Zona inkulumo phakathi kwamabanda la zisamisiwe kancane, njalo zibikwa zizaqhubeka ngoMvulo ngeviki ezayo.
Amabandla la sevumelene entweni ezitshiyeneyo ezigoqela udaba lokuthi kuguqulwe indlela amaphephandaba kahulumende asebenza ngayo kanye lokuthi amabandla wonke akuhulumende kumele ekhankasele ukwesulwa kwezijeziso ezethulelwa iziphathamandla zeZanu PF ngamazwe angentshonalanga.
Abakunkulumo lezi bathi lokhu bedonselana njalo entweni ezitshiyeneyo ezigoqela udaba lokufungiswa kukaMnu Roy Bennett lolokususwa ezikhundleni kukaMnu Gideon Gono loMnu Johannes Tomana.
Inkulumo lezi ziqhutshwa ngudlu njalo uzulu uthi kajabuli ngalokhu ngoba efuna ukuzwa okukhulunywa ngakho kanye lokuthi kuyini okuhluphayo. Le yimbono egcizelelwe yingcwethi ecubungula ezombusazwe uMnumzana Khuli Mathulela Sibanda kungxoxo ayenze loNtungamili Nkomo weStudio 7.
Kodwa umsekeli wesikhulumeli secele leMDC elikhokhelwa nguMnu Arthur Mutmbara utshele uGibbs Dube weStudio 7 ukuthi ibandla lakhe lilethemba lokuthi inkulumo zizagqitshwa kunsukwana ezizayo.
