Iqembu lomdlalo wenguqu ele Highlanders selisebenzisana lenkampani ye Bonique eyenza amakha njengengxenye yemizamo yalo eyokudinga imali.
Ekhuluma ngesikhathi kusethulwa okusemthethweni isivumelwano seqembu le Highlanders lenkampani yeBonique, isiphathamandla salinkampani uBlessings Marangwanda ukhuthaze abalandeli be Bosso ukuba bathenge amakha ukuze bancede iqembu labo.
“Namhla sizotshela abalandeli beqembu le Highlanders ukuba thina njenge Bonique sesibuyile lempahla yethu ukuthi incedise iqembu le Highlanders ngoba nxa bengathenga, amatshumi amabili ekhulwini aloba yini okuyabe kuthengisiwe ayabe ethathwa liqembu le Highlanders,” kutsho uMarangwanda.
Akusikho kwakuqala ukuba iqembu le Highlanders libambisane lezinye inhlanganiso njengendlela yokuqogelela imali njengoba livele lisebenzisana lamankampani agoqela iNyaradzo, iArenel kanye le Sanctuary Insuarance.
Isikhulumeli seqembu le Highlanders uRonald Moyo uthi bazaqhubekela phambili bebambana lezinye inhlanganiso ukuze baqede udubo lwemali ababhekane lalo.
“Ngizathanda ukuthi ngikhulume isitsho esijwalakileyo emaNdebeleni esithi umfula ugcwaliswa yizifudlana. Thina njengeqembu le Highlanders Football Club sibona lokhu esikwenzayo namhla kuzaphathisa kakhulu iqembu ngoba ingxenye engamatshumi amabili ekhulwini eyemali okuzathengiswa ngayo izinto lezi izabuya kuqembu le Highlanders Football Club,” kutsho uMoyo.
Inkampani ye Bonique yenza amakha anukelelayo afafazwa ngumuntu emzimbeni, amakha okugeza kanye lawokugcoba njalo impahla yabo yonke izakube ilophawu lweqembu le Highlanders.
Lesi sivumelwano ngesomnyaka owodwa.
Iqembu le Highlanders lilahlekelwe lusekelo lwemali ebeliluthola luvela kunkampani ye NetOne nyakenye njalo lokhu kulitshiye lisesimeni esingamanga kuhle njengoba selingasenelisi ukubhadala abadlali iholo labo.
Emavikini ayedluleyo lize lakhupha umbiko licela ukuba labo abayenelisayo balisize ngemali ngoba lona lingela indlela eyokuqogelela imali kulezinsuku.
Leliqembu livame ukuthola imali ngokubhadalisa izibukeli nxa zingena enkundleni kodwa lokhu akweneliseki kulezinsuku njengoba umdlalo wenguqu ungavunyelwa ukudlalwa elizweni ngenxa yomkhuhlane we Covid 19 njalo lalapho oke wadlalwa khona bekungavunyelwa izibukeli enkundleni.
