Idale leHigh Court likhangelelwe ukuba ngoLwesine lizahlafuna udaba lwamalunga edale lephalamende awebandla leCitizens Coalition for Change axotshiswa kulelodale nguMnu. Sengezo Tshabangu othi ungunobhala jikelele weCCC.
Amalunga la atshele umsakazo weStudio 7 namuhla ukuba balethemba lokuthi idale leHigh Court lizalandela imithetho yelizwe engavumeli ukuxotshiswa mahlayana kwamalunga edale lephalamende.
UMongameli Emmerson Mnangagwa utshele uzulu ngeviki ephelileyo ukuba kuzakwenziwa ukhetho lwama by-electons lokudinga abazamela izigaba eziyisitshiyagalolunye – 9 okwaxotshiswa amalunga eCCC edale lephalamende.
Kukhangelelwe ukuba idale leNomination Court lizakhetha abazangena kukhetho lwama by-elections ngeviki ezayo. Amalunga ebandla leCCC axotshiswa nguTshabangu ayephansi kohlelo lwe-proportional representation, azakhethwa libandla leli.
UTshabangu uthi uselamagama abazangena ezikhundleni lezi. Ukuze sizwe okunengi ngodaba oluzangena emthethwandaba, sixoxe loMnu. Nqobani Sithole, omele uTshabangu kudaba olwaphanyekwa eHigh Court, othi bazanqoba.
Siphinde saxoxa ngodaba lolu loMnu. Gift Ostallos Siziva, umsekeli wesikhulumeli sebandla leCCC, othi kuzavela sobala emthethwandaba ukuba uTshabangu usebenza lobani.
Forum