Ukuxotshwe kwezisebenzi ezingamakhulu amahlanu okwenziwe yinkampani eyenza imvundiso ye fertilizer, eye Sable, ngenxa yokusilela kwamandla kagetsi, sekutshiye izisebenzi zidlela evalweni ukuthi zizaxotshwa ngobunengi kulandela ukucitshwa kwamandla kagetsi okwesikhathi eside mihla yonke.
Inkampani ye ZESA ithi ngenxa kokoma kwedamu le Kariba lapho okugaywa khona amandla kagetsi ilizwe lizathola amandla la okwamahola ayisithupha kuphela ngelanga.
Lokhu sekubangele ukuthi amankampani afana le Sable axotshe izisebenzi.
Isiphathamandla senkampani ye Sable uMnu. Jack Murehwa utshele iphephandaba le The Herald ukuthi mpela iZESA yiyo imbangela yokuxotshwa kwezisbenzi.
“Sokwenzakele,” kutsho uMurehwa. “IZESA isicitshile saze sabona kungcono ukugumula izisebenzi. Kodwa lokhu sisakhulumisana layo ukuze sibone ukuthi singenzani.
Lokhu kwenzakala nje, kusanda xotshwa inkulungwane lenkulungwane zezisebenzi kulandela isinqumo somthethewandaba we High Court esokuthi izisbenzi zingaxotshwa nxa ziphiwe inyanga ezintathu zokwaziswa.
IStudio 7 ixoxe losomabhizimusi uMnu. Bulisani Ncube oyingcwethi kwezomnotho othi kuyakuthi kusiyaphela lumnyaka, kuzabe sekuxotshwe izisebenzi ezinengi kakhulu kulandela ukucitshwa kwamandla kagetsi mahlayana okuphazamisa umsebenzi wokulungisa izinto ezitshiyeneyo.
“Amankampani amancane engathenga imitshina yokulungisa amanye amandla, anjengalawo avela elangeli awesolar kumbe eyama generator kodwa amakhulu kawasoze anelise ukukwenza lokhu ngoba kungasoze kuphathise ngalutho,” kutsho uNcube.
