Usibalukhulu weReserve Bank of Zimbabwe uMnu John Mushayavanhu ngoLwesithathu ucele uzulu wakoBulawayo labosomabhizimusi ukuthi bamukele imali entsha, yona athi ilohlonzi kakhulu lanxa limali iqhubeka igugudeka emkambo wensitha.
UMushayavanhu wethule amazwi la emhlanganweni awenzele koBulawayo owokuchasisa okunengi ngalimali ebizwa ngokuthi yiZimbabwe Gold (ZiG), yona athi izaqala ukutholakala mhlaka 30 kulinyanga.
Lanxa ekwethuleni limali kumaviki amabili edluleyo uMushayavanhu eveze ukuthi idola leMelika elilodwa lilingana lamaZiG alitshumi lantathu, 13.5, emkambo wensitha idola leMelika elilodwa selithengwa ngamaZiG edlula amatshumi amabili kulezinsuku.
Kodwa uMushayavanhu uthe abathenga lokuthengisa imali emkambo wensitha, abaziwa ngokuthi ngosiphatheleni, bazaswela umsebenzi nje maduze ngoba iZiG kuyimali ezaletha ukuhlaliseka kwezenotho.
Amazwi akhe aza ngesikhathi inhlanganiso yeIMF isithi umnotho weZimbabwe uzancipha, ukhule ngesilinganiso sokuthathu kuphela ekhulwini, 3.2 percent lonyaka. Nyakenye ukhule nge5.3 percent.
UMushayavanhu ulandule amazwi esikhulumeli seZanu PF uMnu Chris Mutsvangwa awokuthi kulegolide elatshontsha ebhanga elikhulu lelizwe esithi lawo ngamanga aluhlaza.
Isikhulumeli senhlanganiso emela abathengi eyeNational Consumer Rights Associatoin uMnu Effie Dlale Ncube utshele iStudio 7 ukuthi ukuze abantu bakholelwe kuZiG, kumele uhulumende akhokhele ngomzekeliso.
Forum