lzizalwane zeZimbabwe ziveza imibono ehlukeneyo ngomthetho osalolongwa owePrivate Voluntary Organisation Amendement Bill 2024. Okwamanje sokulungiselelwa ukuphanyekwa kwawo edale lephalamende. Kusanda kuqhutshwa imihlangano elizweni lonke lapho okube lokuxabana okumangalisayo phakathi kwamalunga ebandla leZanu PF laphikisayo.
Kukhangelelwe ukuba umthetho obunjwayo lo uzahlaziywa edale lephalamende kusikhatshana esilandelayo kulandela imihlangano eveze imibono etshiyeneyo.
Abakubandla leZanu PF basekela iPVO Bill kuthi abaphikisayo bathi inika kakhulu amandla umphathintambo obona ngokusebenza kwenhlanganiso ezizimeleyo olakho ukuvala lezo acabangela ukuba ziphikisa uhulumende. Emihlanganweni esanda kwenziwa elizweni lonke bekuxokozela okumangalisayo.
Umgcinisihlalo wekhomithi eqhube imihlangano le, uMnu. Matewu Save uchaza ngesimo sePVO Bill langalokhu okwenzakale emihlanganweni esanda kuqhutshwa ezabelweni zonke.
"Kuviki ezayo iyeza edale, njalo asivumelani layo ngoba ipha umphathintambo lomabhalane amadla amanengi kakhulu uhlupho umongameli wayengayisayinanga ukuthi ibengujthetho ngoba ayekufuna kwakungekho okuncindezela inhlanganiso ezizimeleyo kodwa vele asisoze siyivume njeengamalunga edale labantu bayalile."
Isakhamuzi sakoBulawayo. uMnu. Ben Moyo, uvumelane loSave.
"Umthetho wePVO Bill 2024 upha umphathintambo lomabhalane amandla ancindezela ukusebenza kwenhlanganiso ezizimeleyo okuzadala ukuthi izigaba zingabi lentuthuko ngoba yizo ezincedisana lohuoumende."
Intathelizindaba uMnu. Mandla Tshuma uthi umthetho obunjwayo OwePVO Bill awulungelanga ilizwe ngoba livele libhekane lobuyanga.
"Kube lumthetho wawulungile ngabe waqala ukusebenza ngesikhathi sikaMugabe, loMonganeli Mnangagwa laye wehlulekile ukuwusayina kuphalamende eledlule, wawubisela edale lakuzulu okutsho ukuthi awuhambelani lokubuswa kweelizwe."
Olwela amalungelo oluntu uMnu. Effie Ncube uthi umthetho wePVO Bill mubi kakhulu.
“Ungananzelela abantu bazaphelelwa yimisebenzi, inhlanganiso ezithile zizavalwa kuthi uhulumende, izibhedlela lentandane zizasela usekelo ngoba inhlanganiso ebezibancedisa sezivalile, impilo izakoma akulamthetho omelana lamalungelo oluntu onjenge PVO Bill."
Induna uKhulumani Mathema oweGwanda uthi abathapha imibono kazulu ngePVO Bill 2024 abafikanga emaphandleni esigabeni sakhe.
"Uma kulukhetho bayafika phansi ebanwtini,kodwa uma sekumayelana lemibono yabo ngesisekelo lemithetho yokubusa ilizwe abafiki ebantwini. Iminyaka edlula amatshumi amabili ngisekhaya angikaze ngibone amalunga edale lephalamende bezothapha imibono kazulu. Baphelela edolobheni eGwanda, kabakaze bafike emakhaya."
UMnu Joseph Tshuma omele iPelandaba/Tshabalala edale lephalamende uqondile umtheto wePVO Bill obunjwayo
"Umthetho lo ulande ukuzoqondisa ukuganga obesekukhona okokuthi abantu besebethatha izimali bethi bazonceda kodwa abamele bancediswe bengatholanga usizo. Umthetho lo, kumele usebenze ezweni ngoba abanye besebethatha izimali kwamanye amazwe besenza ubugwelegwele imali ingafiki eZimbabwe, uzulu kumele awubale awuzwisise lumthetho."
Ngomnyaka odlule umthetho lo wapasiswa edale lephalamende leSenate kodwa uMongameli Emmerson Mnangagwa kazange afake isidindo sakhe ukuze ubengumthetho wasuphendukisa kuzulu. Inengi labantu lithi alihambelani lawo.
Forum