Abalimi endaweni ezinengi zelizwe ezibalisa iMatobo, Gwanda, Lower Gweru, Insiza, Lupane leNkayi bathi sebelima okutshiyeneyo ikakhulu okuhambelana lesikhudumezi esingabakhona izulu lingama ukuna.
Bathi balima inyawuthi, amabele, indlubu lamazambane ajayele ukungatshi emasimini nxa izulu lingasani kahle.
Abalimi laba bathi benza lokhu ngenxa yendlala esibafundise ukuthi akumelanga balime umumbu kukhela.
Omunye wabalimi laba, uMnu. Japhet Sibanda, owesiqintini seNkuba duzane leSivuba eNkayi, uthe ulima okumangalisayo lonyaka njengoba izulu likhanya lisina ngemfanelo.
USibanda uthe, “Lonyaka kukhanya liyathembisa ukuthi nxa lingana ngal’idlela kutsho ukuthi kungaba ngcono. Sikhuluma ngokudla ngoba lingana lokudla kuba ngcono. Mina ngihlanyele amabele i-sorghum ukwenzela ukuthi lanxa lingahamba ukwenzela ukuthi ngivune. Ngifake lendlubu lamazambane.”
Siphinde njalo laxhuma ingcwethi kwezokulima, uMnu. Mandla Nkomo othi abalimi kumele balime ngonanzelelo.
“Umlimi ngomlimi kufanele ayazi indawo yakhe lapho alima khona abekwazi umhlabathi awusebenzisayo kungaba ngumhlabathi obamba amanzi kumbe yisidaka kumbe yitshebetshebe ngoba yikho okuzakutsho inhlanyelo umuntu afaneli ukuthi ayithenge ngalesisikhathi kuyini.
“Isikhathi sokuhlanyela umumbu sesiphose saphela … Thina sixwayisa abantu ukuthi bazame ukudinga lesonhlanyelo ezishesha zivuthwe.”
Ele Zimbabwe okwamanje lithenga amabele emazweni atshiyeneyo ngenxa yokwehluleka ukuqoqa ezokulima njalo lesikhudumezi somkhathi ese El Nino esitshiye uzulu engelakudla.