Sebeqalile ukukhankasela uMnu. Saviour Kasukuwere, owayekucele leZanu PF eleGeneration 40, ukuba angene kukhetho lukamongameli oluzakwenziwa ngomnyaka ka2023.
Abakhankasela uKasukuwere basebenzisa isihloko esithi #TysonWabantu Movement.
UNkosikazi Rosy Phiri, obona ngomkhankaso lo koBulawayo, uthi abantu abanengi bakhanya bethakazelela ukuthi uKasukuwere ufuna ukususa uMongameli Emmerson Mnangagwa esikhundleni okusemthethweni.
Umkhankaso lo usolwe ngabanye koBulawayo abathi bafuna ukubona uKasukuwere ezikhulumela hatshi ukusebenzisa uzulu olambileyo. Omunye wabalombono lo nguNkosazana Brenda Maseko.
UNkosazana Maseko uthi, “Mina ngibona angani bayadlala abantu laba badlalisa abantu, bedlalisa imizwa yabantu. Nxa eqinisile ukuthi ufuna ukuba ngumongameli kumele abuye azikhulumele hatshi ukugijimisa abatsha abalambileyo.”
UKasukuwere, owabaleka elizweni ibutho lisusa owayengumongameli uRobert Mugabe esikhundleni, uthi abantu bamcele ukuthi ancintise ukhetho lukamongameli ngomnyaka ka2023.
Kodwa abakubandla leZanu PF bathi uKasukuwere udlala ngesikhathi ngoba wehluleka ukwenza lokhu ngesikhathi ekucele leG40.
Bathi kuyamangalisa ukuthi kulabantu abacabanga ukuthi uKasukuwere engaba ngomongameli wakwele Zimbabwe.
Omunye wabalomcabango lo nguMnu. Believe Gaule, owake wabekudale leSenate emele iTsholotsho, othi uKasukuwere udlala ngabantu.
Balutshwana abantu abalethemba lokuthi umkhankaso lo, uzadala umahluko empilweni kazulu eZimbabwe.
