Odokotela sebeze babuyele emsebenzini ngemva kokukhalala umsebenzi okwamaviki ayisithupha kulandela isithembiso sikahulumende sokuthenga amaphilisi kanye lakho konke okudingekayo ezibhedlela ngesikhathi esifaneleyo, kodwa iholo alikhuphukanga.
UDokotela Mthabisi Bhebhe, oyisikhulumeli sabodokotela, uthi odokotela baqale umsebenzi ngoLwesine, abanye bazaqala ngoLwesihlanu.
“Odokotela baqalisile umsebenzi lamuhla but sikhangelela ukuthi kusasa isimo ezibhedlela siyabe sitshintshe kakhulu. Namuhla abanye bethu basaqedisa ipaperwork ukuthi beqalise umsebenzi.”
UNkosikazi Nobuhle Masuku, oyisakhamuzi seMpopoma, uthi uyathaba ukuthi odokotela sebebuyele emsebenzini. Uthi nxa odokotela sebebuyele selethemba ukuthi abagulayo sebezathola ukwelwatshwa.
Ugogo uMaNcube uthi uyajabula kakhulu nxa odokotela bebuyela emsebenzini. Uthi abantu bagcwele kakhulu emawadini, kungela sizo abalutholayo.
UDokotela Solwayo Ngwenya ongumqondisi wesibhedlela seMpilo uthe odokotela sebeqalile umsebenzi njalo uthi banengi kakhulu okokuthi akusoze kufunakale ukuthi baqhatshe abanye. Uthe uhulumende seze wenelisa ukukhulumisana labodokotela ukuthi babuyele emsebenzini lanxa iholo labo lingakhuphukanga.
