Amabhanga eZimbabwe asetshelwe ukuthi avimbe ama accounts amabhanga kaProfessor Jonathan Moyo loMnu. Saviour Kasukuwere ababekucele leGeneration 40 ababaleka eZimbabwe kulandela ukuhluthuna umbuso okwenziwa ngamasotsha.
Umbiko owethulwe libhanga elikhulu lelizwe eleReserve Bank of Zimbabwe uqondiswe emabhanga wonke elizwe uthi amabhanga wonke kumele amise ukusebenza kwalawo ma accounts abesesazisa ibhanga lesizwe ukuthi amadoda la alemalini.
UKasukuwere ulendlu enkulu okumangalisayo osekutshiye uzulu ebuza ukuthi engaba wayithatha ngaphi imali yokwakha lindlu.
Ingcwethi ecubungula ezomnotho, uMnu. Butler Tambo, uthi umbiko lo uyasolisa ngoba ukawucaci ukuthi uvela ngaphi njalo ungatsho ukuthi usebenzisa wuphi umthetho.
Unobhala jikelele we bandla lePeople’s Democratic Party, uMnu. Gorden Moyo, uthi lokhu kutshengisa ukuthi umbuso kaMongameli Mnangagwa kawula mthetho.
Ugcizelele wathi bekufanele kuqale kwazakale ukuthi laba abavalelwa izikhwama zebhanga balamacala na kuthoniswe phambi kokuthi kuvalwe ama accounts.
Ukucwayisisa okwenziwe yiStudio 7 kuveze ukuba mpela lezincwadi zithunyelwe emabhanga libhanga lesizwe ele Reserve Bank kumabhanga wonke awelizwe.
UMnu. Jonathan Moyo yena ekhuluma enkundleni ye Twitter uthe nxa imbiko le iliqiniso itshengisa ukwehluleka kwalabo abazithi baletha inguquko elizweni.