UMongameli weleSouth Africa uMnu Cyril Ramaphosa uthi ibandla lakhe alivumelani lenkulumo ezilakho ukuphehla udlakela oluqondiswe ebantwini bokuza eziphuma kwamanye amabandla aphikisayo.
Amabandla la agoqela elePatriotic Alliance, lona elithi izizalwane zakwamanye amazwe, ikakhulu ezingela maphepha ezigoqela ezeZimbabwe, kumele zixotshwe kweleSouth Africa.
Amalunga alelibandla ake abhoda eJohannesburg engenela abokuza ezindlini lasezitolo zabo esithi abaphume baphele.
Umkhokheli weEFF uMnu Julius Malema laye uke wabhoda ngamahotela lamakhefa, wona athi aqhatsha abokuza abanengi etshiya izizalwane zaseSouth Africa phandle.
Egqiba umhlangano webandla lekhe leANC, oweNational Executive Committee Lekgotla ngeSonto, uRamaphosa uthe iANC kumele ibe yiyo ehamba phambili ekukhulumeni ngendaba ze-immigration.
Uthe njalo ingaze yavumela inkulumo eziphehla ukuhlaselwa kwabakwamanye amazwe yizizalwane zaseSouth Africa.
Uthe ibandla lakhe kumele likhuthaze abaza kweleSouth Africa ukuthi badinge amaphepha ngoba leyo kuyindlela elondoloza ukuthula elizweni lakhe lasezansi yeAfrica.
Isikhulumeli senhlanganiso yeZimbabwe Community in South Africa uMnu Bongani Mkhwananzi utshele iStudio 7 ukuthi bayawamukela amazwi kaRamaphosa.
