Amagqwetha akhokhelwa nguMnu. Tendai Biti umkhokheli webandla le People’s Democratic Party acele idale le Constitutional Court ukuthi lesule isigwebo sokuthi umuntu ahlale entolongweni impilo yakhe yonke. Kodwa lumthethwandaba kawethulanga isinqumo.
Umahluli u Godfery Chidyausiku kazange aphe isizatho sokubekwa eceleni kwesinqumo sakhe kuloludaba olukhwezwe kulelidale ngomunye wabagwetshelwa ukuhlala entolongweni okwempilo yakhe yonke, uMnu. Obediah Makoni.
Igqwetha elize limela uMakoni kuloludaba, uMnu. Tendayi Biti uthi okudingwa nguMnu. Makoni labanye abazaphiwa isigwebo esifanayo, kuyikuba befuna iguqulwe indlela indaba zaloluhlobo ziphathwa ngayo.
UBiti utshele idale ukuba ufisa eleZimbabwe lenze njengalokho okwenziwa ngamanye amazwe ukuzihlolisisa lezindaba axolelwe owagwetshelwa ukuhlala entolongweni impilo yakhe yonke nxa kufanele.
UMnu. Kudakwashe Hove,okuhlangothi olubona ngezokukhulumisana lozulu enhlanganisweni ephathise ekukwezeni loludaba edale eye Veritas, uchaze ukuba kungani bekubone kufanele balukhweze loludaba edale laphezulu le Constitutional Court.
UHove uthi abenhlanganiso yakhe bafisa ngabe eleZimbabwe lilandela lokho okwenziwa kwamanye amazwe kundaba zabagwetshelwe ukuhlala entolongweni impilo zabo zonke.
Kodwa igqwetha elize limele uhulumende uMnu. Mike Chimombe uyawuphikisa lumbono lanxa enganelisana ukupha idale izizatho eziqinileyo.
UMnu. Makoni, owasinda isigwebo sokulengiswa, ubikwa wagwetshelwa ukuhlala entolongweni okwempilo yakhe yonke ngemva kokuba etholakale elomlandu wokubulala ngomnyaka ka 1994.
UMakoni useleminyaka engamatshumi amabili lanye elokhu esentolongweni.
UMakoni ufuna luhluzisiswe udaba lwakhe axolelwe nxa kufanele hatshi ukuba lokhe evalelwe ngoba ethi kuyamhlukuluza njalo kwephula ilungelo lakhe.
