Usomabhizimusi omkhulu uMnu. James Ross Goddard uthi eleZimbabwe kumele lilandela imithetho yalo njalo lihloniphe amalungelo oluntu ukuze liyenelise ukuhuga labo abafuna ukuzovula amabhizimusi kulelilizwe.
Ekhuluma emhlanganweni obuqoqwe yiChartered Institute of Project Managers Zimbabwe oqhutshelwe ekolitshini leJoshua Nkomo Polytechnic ngenjongo yokuhuga osomabhizimusi ukuthi bazevula amankampani abo ezansi yemaNdebeleni, uGoddard uthe uhulumende wakuleli kumele ahloniphe umthetho lamalungelo oluntu nxa efuna ukukhanga osomabhizimusi bakwamanye amazwe.
Umphantintambo obona ngokwenzakala eZansi yeMaNdebeleni, uMnu. Abedinigo Ncube, uthe uhulumende uzimisele ukwamukela abafuna ukuvula amabhizimusi eMatabeleland South njalo uthe isigaba lesi silamathuba amanengi awamabhizimusi.
Ukhalaze ukuthi kuvulwe inkampani yenyama eyeLeebix, yona esileminyaka yavalwa. linkampani yayiqhatshe abantu abedlula inkulungwane ngesikhathi ivulile.
Ekhuluma emhlanganweni munye, umgcinisihlalo weARDA uMnu. Bursil Nyabadza uveze ukuthi kulemitshina yokuvuba izithelo eyadingwa ngumuyi uJoshua Mqabuko Nkomo elokhu ingasetshenziswa loba nje sekusele izinto ezimbalwa ukuthi iqale ukusebenza.
Omunye wabosomabhizimusi obekulumhlangano, uMnu Lindani Moyo, osebenzela kwele South Africa kodwa ezalwa eStanmore eGwanda uthe ngombono wakhe ilizwe leZimbabwe lilungele amabhizimusi ngoba lilokuthula.
Osibalukhulu beziqinti ezitshiyeneyo ezansi yeMaNdebeleni baveze ukuthi amathuba ebhizimusi manengi kwezokwakha izindlu, imigwaqo kanye lamadamu, ekwembeni igolide kanye lokufuya inyamazana zasekhaya lezendle.
Umqondisi weChartered Institute of Project Managers Zimbabwe, uMnu. Justin Mahlahla, yena uthe inhlanganiso yakhe incedisana lohulumende wakuleli ukuze kube lentuthuko kwezomnotho.
Lumbuthano uqhutshwe phansi kwendikimba ethi "Mat South is Open for Business" okutsho ukuthi avukekile amathuba ezabhizimusi eZansi yeMaNdebeleni.