Abanikazi bezitolo ezinkulu eZimbabwe ezithengisa okutshiyeneyo bathi bakhangelele ukuthi uzulu uzathenga impahla enengi lonyaka ngekhefu lephasika eliqalisa ngolweSihlanu.
Abanikazi laba abakoBulawayo le Harare batshele iStudio 7 ukuthi okwamanje banengi abantu makhaza abathenga ezifela emlonyeni lokunye okutshiyeneyo abazakudla lemuli kanye labangane ngesikhathi lesi esithakazelelwa nguzulu eZimbabwe.
Bathe kunzima ukutsho ukuthi uzulu uzathenga impahla enengi kanganani lonyaka njengoba amankampani amanengi esehluleka ukubhadala izisebenzi.
Amanye njalo amankampani enjenge Kango Products le Archer Clothing (Pvt) Limited asanda kugumula izisebenzi ngenxa yokuswela imali yokuwavuselela.
Izisebenzi ezinengi kwele Zimbabwe zihola imali ephansi okwamagama okwenza ukuthi ziyehluleke lokuthenga ukudla okwaneleyo ngelanga.
Umnu. Percy Mcijo ongumqondisi we Zimbabwe Congress of Trade Unions eMatabeleland uthe uzulu uzakudla ingqweqwe zomlomo lonyaka ngesikhathi sephasika.
