Osakhulayo uLordwin Rimire ulohlelo lokudingela abalejwabu elimhlophe amafutha avimba ukuba bengahlaselwa ngumkhuhlane wemvukuzane yejwabu- iskin cancer.
Abalwela amalungelo oluntu bayalusekela uhlelo lolu besithi kumele uhulumende ancede abalejwabu elimhlophe ngukuba lemithetho ezakwenza ukuthi benelise ukuthenga amafutha afunakalayo.
ULordwin, yena owathola isicoco seMr. Albinism Zimbabwe lonyaka njalo ofunda ekolitshini leUniversity of Zimbabwe, uthi umkhankaso wakhe olesihloko esithi “One sunscreen, One life saved” ulakho ukunceda abanengi abalejwabu elimhlophe kumbe i-albinism abahlutshwa lilanga.
“Okukhona yikuthi balutshwane abaphila lejwabu elimhlophe abenelisa ukuyathenga amafutha lawa ngoba ayadula. Ngesinye isikhathi afika $20 imbodlela eyodwa, khona umuntu engafuna imbodlela ezimbili ngenyanga. Sikhangele umumo wezinto elizweni, kuyasisinda thina ukuthenga amafutha lawa ngoba abanengi bethu kasisebenzi. Ngilethemba lokuthi ukudinga uncedo esesikuqalisile, kuzasisiza kakhulu ukwenzela ukuthi singatshabalaliswa ngumkhuhlane wemvukuzane.”
Omunye osakhulayo olesimo lesi uRejoice Maphosa ohlala koBulawayo uthi uyalincoma inyathelo lokudinga ama-sunscreen, kodwa kumele labo abafuna ukunceda, bethenge amafutha ahambelana laye labanye bakhe.
“Siyathakazelela ukuthi bakhona abanengi abasincedayo- lokhu siyakubonga. Kodwa kuqakathekile ukuthi sibe kwazi amafutha okuthenga ngoba akhona amanye angahambelani lathi kuhle. Awomhlobo lweNivea Q10 yiwo ahambelana labanengi bethu, njalo siyafsa ukuthi sithole lawa mafutha. Kuyikuthi amafutha lawa awahambelani lawe, abanye bengayenza amaqhubu, leziny izifo ezingalethwa ngamafutha lawa.”
ULordwin uthi banengi abalejwabu elimhlophe abahlala emaphandleni abahlaselwa ngumkhuhlane wemvukuzane uma kuqathaniswa labahlala emadolobheni.
Lokhu kusekelwa ngokusanda kwethulwa yinhlanganiso yeAlbino Association of Zimbabwe ethi kulabantu abalitshumi ababulewe ngumkhuhlane wemvukizane lonyaka eZimbabwe.
UMarvelous Tshuma olejwabu elimhlophe uthi kuqakathekile ukuba bancedwe nguhulumende.
“Amafutha lawa avela kwamanye amazwe, njalo nxa engena kwelakithi, abhadala imali yeDuty, okubuya kwenze ukuthi intengo athengiswa ngayo ezitolo zalapha, ikhwele kakhulu. Kodwa kukhona okunengi esikwaziyo okungabhadali izimali lezi nxa kungena elizweni. Kungasinceda uma imali leyi ingakhitshwa, amafutha ethu enelise lawo ukuthi engine elizweni kungela mbadalo ofunekayo.”
UZibusiso Munandi, osakhulayo njalo engumqondisi wenhlanganiso emela amalungelo abatsha, eyeAbangane, uthi kuyabukeka okwenziwa nguLordwin.
“Nxa silabo phakathi kwethu abalombono onje, kumele sibambelane labo ngoba abakwenzayo kunceda uzulu. Masiyekeni ukubona okwenziwayo lokhu njengento yomuntu oyedwa, kodwa masikuthatheni sikwenze okwethu lathi. Amazwi ethu angaba manye, ayenelisa ukufika khatshana. Ngilethemba lokuthi ukudinga uncedo ngendlela enje kuzanceda sibili.”
UNkosikazi Samantha Sibanda okunhlanganiso yeHope Trust uyakusekela lokhu esithi uhulumende ulomlandu wokunakekela abalejwabu elimhlophe.
“Lapho okwabhoda abameli bezigaba zedale lephalamende, bebuza uzulu ukuthi kuyini abathi kumqotho njalo kufuna ukunikwa imali kahulumende ngomnyaka ozayo, thina njengenhlanganiso sakhuthaza ukuthi kube lesikhwama sikahulumende esimele abaphila lobusophe kuphela, iAlbinism Fund. Imali le inganceda ukuthi lathi lapha senelise ukuzilungisela amafutha lokunye okudingwa ngabaphila lobusophe, hatshi ukuba silokhu sikuthenga ngaphandle kwelizwe.”
IStudio 7 izame ukuzwa umbono kahulumende phezu kodaba lolu, kodwa abaphathintambo bengatsha zemali kanye lezempilakahle bebengaphenduli omakhalekhukhwini.
ULordwin uthi abangafuna ukunceda bengamthinta kumakhalekhukhwini kunombolo ethi +26378497051, kumbe kuEmail ethi albinismguru@gmail.com. Uthi ukhona njalo kuInstagram, Facebook laku LinkedIn, ekhasini elithi Lordwin Rimire.
Forum