Amazwe amanengi afana leBhilithane, eleMelika, Canada laweEuropean Union asevimba abantu abavela ngezansi yeAfrica kulandela ukuqhamuka komkhakha omemetheka ngamandla oweCOVID-19, obizwa ngokuthi yiOmicron otholakele eBotswana lakwele South Africa.
Izizalwane zeZimbabwe ezinengi ezihlala kwele Bhilithani bezithenge amatikiti endizamtshina zisiyadlala ikhefu leKhisimusi lezihlobo labangane ekhaya, Pho zisahamba?
Yatsho ingoma yathi ‘sokuphinde kwabanjalo lonyaka’. Ngomnyaka ophelileyo ngesikhathi lesi inengi labantu abahlala kwele Bhilithane lehluleka ukuya ekhaya livinjwa yimithetho eyafakwa nguhulumende wakulelo enqabela ukumemetheka komkhuhlane weCOVID-19 kwathiwa abantu bahlale phansi bangayindawo.
Balungiselele njalo lonyaka, nanko omunye umkhakha obizwa B.1.1.529 (omicron) usuvunjululwe eSouth Africa.
Amaphupho wonke asephelele phansi ngoba uhulumende weBhilithane sevalile njalo indizamtshina eziya eZimbabwe leSouth Africa.
UNkosikazi Sisa Oseh ohlala edolobheni leLondon uthi usephelelwe.
"Thina abanye besesithengile amatikiti endizamtshina, vele sesilungiselele nje ukuhamba. Dikidiki nampo besivalela. Ngibuhlungu kakhulu ngoba indaba yokuthi baphongukuthi basivalele nje basifake kured zone just like that. Koze kube nini siphethwe kanje."
Omunye obekhangelele ukuya ekhaya ngekhefu leKhismusi nguNkosazana Christine Ncube wedolobheni leDublin kwele Republic of Ireland.
Omunye obekhangelele ukuya ekhaya ngekhefu leKhismusi nguNkosazana Christine Ncube owedolobheni leDublin kwele Republic of Ireland.
"Uyazi ngimadanelo mabi bengithembele ukuthi ngizahamba ngiyekhaya ngiyebona lapha okulele khona ubaba, pho indiza sezivaliwe asisakwanisi futhi ukuhamba. Sokuzaba yiproblem futhi ukuthi sithole ama refund ethu kuma Airlines ngoba indaba le eyeCovid isisthwalise nzima besesithembile ukuthi siyabe silemuli zethu ekhaya kodwa ke hayi kwehlule futhi."
UMnunzana Khumbu Mabaso wedolobheni leLeicester uthi umadolomanzi ubelungiselele lemuli yakhe ukuya kwenza umcimbi ekhaya bahlabe imbuzi bejabulela ukuhlangana lezihlobo. Bekumele bagade namhla ntambama.
"Sesithola ama email ekuseni ukuthi amatikiti ethu secanceliwe no refund asitholanga amatikiti, kubuhlungu kakhulu lokhu ngoba be ngithenge amatikiti ami lemuli yami singu 5. Imali yonke indliwe ngama agency, besicabanga ukuthi sizaba labazali lemuli zethu ekhaya khonangale sikholisa. Asikwazi ukuthi sizakwenza njani njengoba lasemsebenzini besithethe amaholiday sizitshela ukuthi siyabe sisekhaya manje sesiyabe sesilokhu sibhoda ngendlu khonapha emakhazeni."
Kulabanye abavele sebefikile eZimbabwe kodwa akusabiyeleki ngoba indizamtshina ababuya ngazo sezimisiwe.
UNkosikazi Belinda Nkomo, okoBulawayo okwamanje ubezobeka unina owabhubhayo ngeviki ephelileyo, ukhala ezimathonsi.
"Ngibuye ngisuka eUK lomnawami uSihle mhlaka 20 November sizobeka umama ositshiyileyo. Bekumele sibuyale mhlaka 30 November kodwa we received emails ukuthi ama flights ethu have been cancelled by Emirates. Ngitshiye abantwabami abathathu omncane ule 9 months baloyise e Birmingham. Sengiphelelwe and inhliziyo yami ibuhlungu bhudi."
UNkosazana Precious Dube oweBelfast, eNorthern Ireland ulomlayezo kumzawakhe oyemhlangabeza kwele South Africa osokumele abuyele ekhaya ngoba uMaDube kasezi.
"Bekumele ngigade ngolwesibili so bangifakele umlayezo lapha bathi amaframatshina avaliwe akusahanjwa akuhambeki. So into ekhona lapha yikuthi ngikwazise mzala ukuthi ahh kwehlule la this year ukuthi ngihambe ekhaya besengibophile izikhwama labantwana sengilungisile sengilungela ukuthi ngiyadonsa ngolwesibili lalonyaka kwehlule ngiyabe ngikhonapha."
Banengi kakhulu abantu abathenge amatikiti endiza abafuna ukuya ekhaya, Unkosazana Sukulohle Mzilankatha uthi ukojova kwakhe ijekiseni yokuvikela iCovid-19 akuncedanga.
"Kade sikhangelele ukuthi sizahamba ekhaya siyedlala ikhisimusi labadala labanye abasekhaya,kubuhlungu kakhulu ngoba nxa ungu muntu suthengile itikiti uzimisele ukuthi uyahamba bavale bestshela ukuthi mele sithathe ivaccine kodwa siyithathile ivaccine yakhona, akusisebenzeli akusincedi ngalutho besiyithathelani nxa kungasincedi."
UMomgameli Cyril Ramaphosa wele South Africa ukhuthaze amazwe asentshonalanga okuhlanganisela iBhilithane, EU, leMelika ukuthi akhiphe izinqumo zokuvimba indiza lezivakatshi ngoba babulala ezemnotho wamazwe eningizimu yase Africa, kulandela ukutholakala komkhakha we Covid 19 omutsha we Omicron.
Amankampani awendizamtshina afana labo Emirates Airlines le Qatar Airways bonke bathe bona balandela izinqumo zamazwe lapho abaphaphela khona. Babuye bathi bazabisela imali yonke kulabo abathenga kubo amatikiti.
