Odokotela besibhedlela seMpilo Central Hospital koBulawayo, bekhokhelwa nguDokotela Solwayo Ngwenya, bethule umbiko wokumema abazali ukuzobhalisela ukuhlolwa lokuhlinzwa kwabantwana labadala abazalwa belezitho zensitha ezingacaciyo ukuthi ngumfana kumbe yintombazana.
Lokhu uthi bakwenza ngenjongo yokuvikela umkhuhlane wemvukuzane lapho sebekhulile.
Okwamanje abangafuna lolosizo bayamenywa ukuthi bazobhalisela ukuhlolwa lokuhlinzwa ethi kunje abantu sebaqalile ukuzobhalisa.
"Silohlelo lokubhalisela ukuhlolwa lokwelatshwa kwalabo abantwana kumbe abadala abazalwa belezitho ezingacaciyo ukuze sibasize ngoba bengakhula kungalungisiswanga kusuka kudale ubunzima empilweni zabo."
Wengeze ethi ngokuya kwesikhathi umuntu ozalwa elalesi simo kudala umkhuhlane wemvukuzane laph esekhuile.
“Silabo ezweni abantwana abazalwa belobulili obungacaciyo njalo ebafaneni kudala imvukuzane kuthi lemankazaneni njalo izisu zabo ziyakhukhumala beze lapha esibhedlela sebelemvukuzane esidle ingaphakathi kakhulu. Balakho ukwelathswa lababantu njalo uma kusiya kumele bethi bezalwa baphume esibhedlela sebelungisiwe kodwa balakho ukwelatshwa lapho bengakafikisi umnyaka."
Abalwela amalungelo abantu abazalwa belalesi simo, bathi kuluhlelo oluhle kodwa iziphathamandla zesibhedlela aziyeke abantwana bakhule bazikhethele ubulili ababufunayo obuhambelana labo njalo amazwi akusimemezelo lesi alobandlululo.
Olwela amalungelo abantu abalesimo lesi, engumqondisi wnhlanganiso eyeIntersex Advocacy Trust Zimbabwe, uMnu. Malume Ngwenya uthi luhlelo oluhle kodwa ngakwelinye icele lungaluhlanga. Ethi kuqakathekile ukuba iziphathamandla zesibhedlela zikhulumisane labo njalo aziyeke abantwana bakhule bazikhethele ukuthi ungumuntu oyini.
“Uhlelo oselumenyezelwe esibhedlela seMpilo, luhle lungaluhlana, ngabe basibizile thina esisebenza lalababantu sababonisa njalo kabayeke abantwana abalobulili obungacaciyo bakhule bafike esibangeni sokuzikhethela ukuba imizwa yabo iminjani ukuze kusasa kungabi lohlupho."
Obona ngokuqhutshwa kwenhlelo zobulili lokukwela amalungelo ecansi eVoice of the Voiceless, uMnu. Milles Moyo uthi sebezwile ngalolu hlelo kodwa abajabuliswa ngamanye amabala alesi simemezelo ngoba alobandlululo.
“Ulimi abalusebenzisileyo lubangela ukuba kubelokuhkethana kumbe ukubandlululwa kwabantu abalobulili obungacaciyo sengathi kulento engaqondile ngabo. kuqakathekile ukuba bakhulume labantu laba bengakabelaphi."
UDokotela Ngwenya uchaze ukuba yena labanye bakhe baqale loluhlelo benanzelela ukuqansa kwenani labantu abeza esibhedlela sebelemvukuzane esidle ingaphakathi okudlulise amalawulo njalo inengi labo ngabalobulili obunacaciyo.
EZimbabwe inani labantu abazalwa belobulili obungacaciyo alaziwa ngoba isisekelo sombuso welizwe sicalwa ngokungcindezela amalungelo abo njalo lohulumende kasekeli amalungelo abo ezemacansini.
UDokotela Ngwenya usole abazali abagcina abantwana emakhaya bengaphenduki labo esibhedlela ukuthi bazokwelatshwa kusase masinya kodwa beza labantwana laba sebekhulelwe yimvukuzane yangaphakathi ikakhulu eyezitho zensitha.
Uchaze ukuba abantwana abancane labadala abakhulu bazakwelatshwa mahala kuthi abanye abavele behlawula esibhedlela bazahlawula kuthi abanye uma kusenza badingelwe usizo.
Kusukela ngeSonto mhla ka 16 Nhlangula abantu abedlula abalitshumi sebethe baqala ukuthola usizo abanye lokhe bebhalisa ukuthola usizo esibhedlela seMpilo ukuze bahlolwe kubonakale ukuba bengaphiwa sizo bani.
