Odokotela ngoMvulo bathethe isinqumo sokuthi kababuyeli emsebenzini uhulumende engakalungisi konke okubahluphayo okugoqela ukubhadalwa iholo ngamadola.
Odokotela abakunhlanganiso yeZimbabwe Hospital Doctors Association (ZHDA) benze isinqumo lesi kulandela umhlangano abawenze eHarare kulandela abakuvumelana lohulumende ngoMgqibelo.
Kwavunyelwana ukuthi kumele bakhulume lamalunga abo ukwenzela ukuthi babuyele emsebenzini phakathi kwamahola angamatshumi amane lasitshiyangalombili (48 hours).
Bathi kwehlule ukuthi babuyele emsebenzini ngoba uhulumende lokhe eqhubekela phambili esithi kasoze abaholise amadola eMelika njalo kavezanga ukuthi uzathenga njani okumele kusetshenziswe ezibhedlela.
“Sihlale phansi sakhuluma labanye bethu njengalokhu obekumele sikwenze kulandela ukuvumelana lohulumende ukuthi sixoxisane. Amalunga eZHDA athe isivumelwano esisenze lohulumende kasilungisi inhlupho zethu. Akulalutho osolulungiswe nguhulumende okuzasenza sibuyele emsebenzini. Odokotela lokhu bethwele nzima ngenxa yesimo somnotho esibi okumangalisayo.
“Phezu kwalokhu, akukho okuveza ukuthi uhulumende uzalandela esikufisayo ngokuthenga amaphilisi lokokuzivikela ezibhedlela zikahulumende. Sazama okwenyanga ezintathu ukuthi sivezele uhulumende esibhekane lakho sicabanga ukuthi kuzalungiswa. Kodwa akulalutho olwenziwa nguhulumende.”
Odokotela bathi abenelisi ukuthola amafutha ezimota lokunye okungabenza bayesebenza ezibhedlela.
“Silokhu sithwele nzima ngoba akulalutho oluguqukileyo. Ngakho-ke kasenelisi ukuthi sibuyele emsebenzini kungakalungiswa konke okusihluphayo. Kuqakathekile ukuthi odokotela abalutshwana kakhulu abacabange ukuthi babuyele emsebenzini benze lokhu besenzela ukuthoba inhliziyo zabo kodwa-ke lokhe besekela konke okwenziwa ngabanengi abazihlalele ezindlini zabo. Silethemba lokuthi izikhalazo zethu zizalungiswa nguhulumende ngesiphangiphangi.”
Kasenelisanga ukukhuluma ngodaba lolu leziphathamandla zenhlanganiso yeHealth Service Board kanye lohlangothi lukahulumende olubona ngezempilakahle.