Odokotela labongi abale ukuya emsebenzini kusukela ngoLwesihlanu ngeviki edluleyo bathi balakho ukubuyela ngoLwesibili kulandela ukuza kwencwadi zabo zeholo zama payslips.
Odokotela laba bathi lanxa bebuyela emsebenzini kabayi ngenhliziyo ezimhlophe ngoba iholo liphuzile njalo leholo lebonus lingaziwa ukuthi lizabuya nini.
Umgcinisihlalo wenhlanganiso yaboDokotela, iHospital Doctors’ Association of Zimbabwe, uDokotela Fortune Nyamande utshele iStudio Seven ukuthi odokotela labongi besebebhekane lodubo olukhulu.
Uthe uhulumende kamelanga aphinde njalo ukuphuza ukubapha iholo ngoba kube lezimfa, ikakhulu zensane ezisanda belethwa, ezenzakale ngoba uhulumende ephuze leholo lezisebenzi.
Omunye wabodokotela laba, uDr Muyambi Sithole utshele iStudio Seven ukuthi lanxa bethole incwadi zeholo bazaqala umsebenzi nxa sebebone ukuthi mpela imali ikhona emabhanga.
