Inhlanganiso ebona ngezempilakahle emhlabeni wonke jikelele eyeWorld Health Organization ithi abesilisa abayigidi ezilikhulu lamatshumi amahlanu – 150 million babelesimo sokungasebenzi kahle kwenduku kababa, okubizwa ngeSilungu ngokuthi yiErectile Dysfunction, emhlabeni wonke jikelele ngomnyaka ka1995 njalo inani leli likhangelelwe ukuba lizakhuphuka lifike izigidi ezingamakhulu amathathu lamatshumi amabili – 320 million ngo2025.
Inani leli ligoqela abadabuka eZimbabwe okukhulunywa kufihlwa ngodaba lolu. I-WHO ithi abantu abaleminyaka yokuzalwa esuka kumatshumi amane kusiyaphezulu balakho ukuba lesimo lesi, esenza induku kababa ingasebenzi kuhle. Odokotela bathi kunengi okudala isimo lesi. UDokotela Derick Matshika uchasisa ngesimo se-Erectile Dysfunction.
“Lamuhla sibuye ngendaba ebizwa ngokuthi yi erectile dysfunction kumbe ukungasebenzi kuhle kukababa ngapha ngaphansi emacansini. Asomkhuhlane wona ngokwawo kodwa yinto esiyithi yi symptom etshengisa ukuthi kulomunye umkhuhlane ngemuva kwawo, kufuze ukuthi udingisiswe njalo welatshwa nge sikhathi. Ngiyakwazi ukuthi ngenxa yokuthi lokhu kujayele ukuba yimfihlo kumbe indaba eyangisayo, abantu bacina bedinga usizo endaweni ezingayisizo, kunathwe imithi ephambanisa ama kidneys. Bakhona sibili abantu abacina belahlekelwa zimpilo ngemva kokunatha imithi leyi. Siyakhuthaza ukuthi abantu badinge usizo ngendlela efaneleyo.”
UDokotela Matsika uthi phose bonke abesilisa bayake behluleke ukuya emacansini ngoba bayabe bekhubazekile emcabengweni.
"Amadoda amanengi, phose wonke umuntu sewake waba ke erectile dysfunction kungabe kwakubangelwa ngama psychological problems kodwa ungadinga uncedo masinya yasizakala. Ama psychological problems lawa asuka egqondweni kungabe kuyikuthi umuntu uhlukuzekile emsebenzini kumbe ngekhaya kodwa lumuntu engavele akhiphe i stress uyande ukuba right. Siyananzela futhi ukuthi nxa umuntu engabambanga kuhle i BP kumbe itshukela ucina engasayenzi kuhle emacansini. I treatment ikhona esibhedlela, kulamaphilisi kulamajekiseni. Ngenyanga leyi eyabobaba, uNovember siyakhuthaza ukuthi lingesabi ukudinga uncedo nxa umuntu engazibona engasasebenzi kuhle njengobaba.”
Abanye abezempilakahle bathi kumele abesilisa abalohlupho lolu bedinge uncedo kubodokotela. Umongi ohlala koBulawayo, uMnu. Mthulisi Moyo, uchasisa kabanzi ngalokhu.
“Uhlupho esihlangana lalo yikuthi inengi labantu sebephila lemikhuhlane, efana letshukela, ebangela kumbe ethundubeza ubukhali bukababa. Nxa le imikhuhlane ingelatshwa kuhle, akufiki ebangeni lokuthi umuntu aswele amandla emacansini. Kuqakathekile njalo ukuthi nxa umuntu egula adinge usizo engadaneli ebantwini kumbe emithini engelaqiniso layo kumbe ezaphathisa okwesikhatshana kuphela. Esibhedlela balakho ukupha umuthi olesilinganiso esifanele umzimba singasoze siphazamise ukusebenza komuntu”
Odokotela labanye ababona ngokwenzakala emphakathini bathi abantu abanengi abalesimo lesi kabaphumeli egcekeni ngenxa yokwesaba ukuchothozwa nguzulu. UMnumnzana Ellion Mdlawuzo ohlala koBulawayo uthi kudala kwakulemithi yokuvusa induku kababa.
“Ukungasebenzi kwenduku zabobaba kuluhlupho kakhulu, njalo sekuvamile kakhulu. Kudala bekukhona kodwa bekungavamanga that much ngoba bekulezihlala ezithile ekade zivele zisetshenziswa. Beziselapha into ezinengi, so bebebalitshwane abebesiba lakho. Esikhathini esinengi kutholakala ukuthi ube lakho ngoba kube lokuphambaniseka emzimbeni. Kodwa kungasikho lokho bekungavamanga, ngoba bekuselatshwa ngesintu kuphele. Khathesi sebebalutshwane abalokwazi.”
UNkosikazi Sitshengisiwe Hadebe umhlali wakoBulawayo uthi ngitsho lasemitshadweni abanye obaba bayafihla uhlupho lolu.
“Indaba leyi yokuya emacansini inzima ngoba ngesintu esikhule ngaso asandanga ukuxoxa ngazo ngitsho lemakamelweni. Uyezwa umuntu esithi ngidiniwe kuphelele khonapho, engaze waphumela egcekeni ukuthi ulohlupho. Yikho obaba becina benatha imithi ecina ibalimaza emzimbeni, besesaba ukuya esibhedlela. Siyafisa kube lenhlelo ezisipha amathuba okuthi sixoxisane ngendaba zemacansini.”
Abezempilakahle bathi kumele abantu abalesimo lesi behlolwe ezibhedlela ukzwenzela ukuba isebenze ngemfanelo induku kababa.
Forum