Odokotela abasathuthukayo abakhalala umsebenzi ekuqaleni kukaMbimbitho sebebuyele emsebenzini. Isikhulumeli sabo, uDokotela Mxolisi Ngwenya, uthi sebevumelane leziphathamandla zikahulumende kanye leHealth Service Board ukuthi kukhuphulwe imali yabo yokubizwa emsebenzini nxa bengekhaya eye call allowance.
Umbiko osanda kwethulwa yiHealth Service Board uveza ukuthi ngempela sebevumile ukulungisa konke okuhlupha odokotela.
UNgwenya uthi kunengi okunye okuzalungiswa nguhulumende.
“Sibonga uMongameli Emmerson Mnangagwa ongenele kudaba lolu. Osokwenzakele yikuthi iHealth Services Board labodokotela sesihlale phansi savumelana ukwengeza imadlana enikwa odokotela ku on-call kusuka kunani ebeliyi $1.50 ngehola kusiya ku$7.50. Sivumelana njalo ukuthi imithi izabe ibuya ngokuhamba kwesikhathi.”
Odokotela bebetshaya phansi ngenduku besithi kababuyeli emsebenzini kuze kulungiswe konke okubahluphayo.
Odokotela bake bakhalala umsebenzi nyakenye bekhonona ngokufanayo kodwa uhulumende kazange alungise okubahluphayo.
