Odokotela abakhulu bezibhedlela zikahulumende sebekhalale umsebenzi besithi basekela odokotela abathuthukayo abalenyanga bekhalale umsebenzi.
Odokotela laba ababizwa ngokuthi ngama registrars babikele abaqondisi bezibhedlela ukuthi kabasenelisi ukusebenza ngenxa yokumiswa umsebenzi kwabodokotela abathuthukayo. Umthethwandaba weLabor Court wathi akukho emthethweni okwenziwe ngodokotela laba.
Ukukhalala umsebenzi okwenziwe ngama registrars kulandela umbiko abawethula ngeviki ephelileyo lapho abanika uhulumende amahola angamatshumi amane lasitshiyangalombili – 48 hours - ukuthi alungise udaba lwabodokotela abakhalale umsebenzi befuna ukubhadalwa ngamadola lokunye okutshiyeneyo.
Umsekeli kamongameli uMnu. Constantino Chiwenga uthi uhulumende kasoze aholise odokotela ngamadola eMelika.
Kusenjalo, uMongameli Emmerson Mnangagwa obekukhefu kubikwa ukuthi usebuyele emsebenzini. Ukuze sizwe okunengi ngokwenziwa ngodokotela abakhulu abakhalale umsebenzi, iStudio 7 ixoxe loDokotela Mthabisi Bhebhe, unobhala jikelele wenhlanganiso yabodokotela eyeZimbabwe Hospital Doctors’ Association.
UDokotela Bhebhe uthe kuzwisa ubuhlungu ukuthi uhulumende kafuni ukulungisa okubahluphayo.
