UMongameli Barack Obama weMelika sekhuthaze ukubambana phakathi kwabantu benkolo ezitshiyeneyo elizweni lakhe esithi inzondo eqondiswe kwabokholo lwesiMoslem ngabanye abantu kayilunganga njalo kayakhi ilizwe. UObama wethule amazwi la ngoLwesithathu esethekelela isakhiwo esikhonzela amaMoslems eBaltimore. Uthe ukusola abokholo lwesiMoslem ngodlakela olwenziwa ngabalutshwana abalandela lolukholo yinto embi. uphinde wakhuthaza abasakhulayo abalandela lolukholo ukuthi bengaze bahugwa ngabahlamuki balolukholo abadlulisa amalawulo.
Ukuhlaziya loludaba iStudio Seven ixhume isiphathamandla sebandla leMDC-T khonapha eMelika uMnumzana Muzi Ncube yena othi uvumelana loMongameli Obama kunkhuthazo yakhe yokuthi abantu bengakhethani ngokuthi bakhonza yiphi inkolo.
"Osokwenze abantu abangamakholwa esiMoslem kwele Melika bakhanye sebehlalele evalweni yikuthi sebebanjaniselwa lalabo abalwa becatsha abesiMoslem abedlulisa amalawulo, abamaqembu afana labe Boko Haram, amaTaliban abeIsis labanye, ikantike yikuphambanisa lokho. Bona sebefela izono zabanye abangela ndaba lemiphefumulo yabantu abahamba bebulala abantu mahlayana emhlabeni jikelele bezithi bakwenzaphansi kwenkolo yesiMoslem", kutsho uNcube.