Ibandla eliphikisayo ele Multi-Racial Christian Democrats likhuthaza umongameli Robert Mugabe ukuba athathe amanyathelo okulungisisa ingxabanxoza esebandleni lakhe leZanu PF yokubanga isikhundla sakhe lezinye osokudale izehlakalo zodlakela ezilakho ukuphazamisa umumo wokulondolozwa kokuthula elizweni.
Osaphethe isikhundla sikamongameli webandla le Multi-Racial Christian Democrats umnumzana Mathias Guchutu uthi noma ukukhankasela izikhundla kukhomba umbuso wentando ka zulu, indlela esisenziwa ngayo okugoqela ukuxabana lokulwisana kuyinto edanisayo kakhulu engadalela abantu abangelani lokwenzakalayo kuZanu PF inkinga.
Ibandla le Zanu PF lilungiselela umhlangano walo omkhulu owe Congress okhangelelwe ukwenziwa ngenyanga ezayo kaMpalakazi, kulokufuthelana okukhulu lokukhombana ngeminwe phakathi kwamacele agoqela elibikwa likhokhelwa ngu nkosikazi Joice Mujuru lelikhokhelwa ngumnumzana Emmerson Mnangagwa kususwa lasezikhundleni inkokheli zezabelo ezikhanya zingasekeli umkamongameli Grace Mugabe.
Lokhu kuhlanganisela ukulwisana kwabatsha lapha lalaphaya endaweni ezitsheyeneyo zelizwe, ezibalisa edolobheni le Mutare, eGwanda, lokuthunjwa kuka Jim Kunaka osakhulayo webandla le Zanu PF emzini weMbare eHarare kuyonaleli iviki. UKunaka odume ngokukhokhela iqembu labasakhulayo beZanu PF elithiwa yiChipangano uthunjwe ngelinye icele lalelibandla elikhokhelwa nguMnangagwa esetheswa umlandu wokuba ngowecele elisekela unkosikazi Mujuru.
Umnumzana Guchutu uthi ukwenza okunje kutshengisa ukuba lokhu sokuludaba lwelizwe hatshi olweZanu PF kuphela ethi umongameli Mugabe umele elulungisise konke lokhu lelizwe lithandazele ukuthula:
Ilunga lebandla le Zanu PF elingafunanga ukuziqamba ngebizo litshele lumsakazo ukuba abasekeli baka Mujuru sebetshengisa ukumsekela phakathi kukazulu kuzabelo ezithile okugoqela eMashonaland East lase Masvingo kubekwa ama poster ikakhulu emapulazini athi phambili ngo Mujuru ecothoza abatshotshozela ukuthi atshiye lumsebenzi kumbe axotshwe ebandleni.