UMongameli Mugabe usole amazwe angentshonalanga ngoLwesine esithi kawaluqakathekisi udaba lokulinganiswa kwamathuba phakathi kwabesifazana labesilisa.
UMugabe wethule amazwi la ekweleEthiopia emhlanganweni weAfrican Union ngemva kokuba ebuzwe yintathelizindaba yeStudio 7, uSandra Nyaira, ukuthi kuyini azakwenza ekuthuthukiseni abesifazana nxa esengumgcinisihlalo weAU.
Abakhokheli bomanyano lo bazahlangana ngoLwesine behluza indaba ezithinta izwekazi leAfrica eigoqela umkhuhlane weEbola kanye lomvukela wabahlamuki beBoko Haram kweleNigeria.
Ekupheleni komhlangano lo ngoMgqibelo, uMugabe uzaphiwa isihlalo sokukhokhela iAU okomnyaka. Indikimba yalumhlangano ngeyokuqakathekiswa kwabesifazana.
UMongameli Mugabe uthe lanxa abakhokheli beAfrica bezimisele ukuthuthukisa abesifazana kunhlangotho zonke zempilo, kunengi okusuka kuvimbe limizamo.
Kodwa uthe lanxa kunjalo, amazwe eAfrica enza ngcono kakhulu kulamazwe engentsholananga, wona athi alamalunga edale lephalamende amalutshwana kakhulu awesifazana.
Sixhume olwela ilungelo labesifazana njalo engumlobi, uNkosikazi Janah Ncube sambuza ukuthi ubona amazwe eAfrica ewufeza na umlangdu wokuphakamisa omama.
Ukuhlaziya okwenzakala emhlanganweni womanyano we African Union osaqhubeka eAddis Ababa eEthiopia, sixoxa loNkosazana Thabitha Khumalo omela iBulawayo East edale lephalamende endawonye loMnu. Morris Ngwenya ingcwethi ecubungula ezombusazwe njalo elilunga lebandla leZANU PF.
