Ibandla leMthwakazi Republic Party liqhube umhlangano walo omkhulu we rally eTshabalala Hall ngoMgwibelo, lapho elitshele abalandeli balo ukuthi lizakwazisa amazwe omhlaba kusukela kusasa lisebenzisa i-petition, ukuthi alisafuni ukubalelwa ngaphansi kombuso weZimbabwe, ekuqhubekeni komkhankaso wabo wokuthi elikaMthwakazi kufanele lizimelelodwa njengelizwe.
Ekhuluma kulumhlangano, umkhokheli walelibandla uMnu. Mqondisi Moyo uthe bazaphuma ijumo kusukela ngeSonto, bekhankasela ukuphuma ngaphansi kombuso welizwe leZimbabwe,
Uthe badinga amasignature abantu afika inkulungwane ezingamatshumi amabili abayisibonelo senani labantu ababulawa ngesikhathi seGukurahundi, abazawasa kwamanye amazwe bewazisa ngohlelo lwabo.
Umqoqi webandla leMRP, uMnu Patron Xaba uthi lolu ludaba olumqoka njalo bazimisele ukuthi bezimele bodwa njengelizwe elikhululekileyo.
UNkosikazi Sibongile Latifa Banda umgcinisihlalo wabesifazane kubandla eMRP uthi uhlelo lolu luzaletha inkululeko.
Isikhulumeli sabesifazane kubandla leMRP,uNkosikazi Sithembakuye Moyo uthi uyalusekela uhlelo lolu ngoba yibo abazwa ubuhlungu njalo bafelwa ngesikhathi sombhuqazwe wegukurahundi.
Ibandla leMRP lenelise ukuthola amasignature edlula amakhulu amahlanu njalo lithi lizangena kuzozonke iziqinti ezikoMthwakazi laseNkabazwe lidinga usekelo ukuze liye kwazisa amazwe omhlaba ngesinqumo elisithetheyo njengoba umbuso okhona elizweni ulobandlululo lochuku.
