Umkhokheli webandla le MDC-T, uMnu. Morgan Tsvangirai, uthi kubi kakhulu okwenziwa ngabanye abantu abahlasele uNkosazana Thokozani Khupe ngeSonto abacabanga ukuthi uphikisana lokubunjwa komanyano weMDC Alliance.
UTsvangirai wethule umbiko lamuhla otshengise ukuthi kathabanga ngokwenzakale kuMaKhupe, otshaywe ngabacatshangelwa ukuthi bakubandla lakhe esemhlanganweni obuhlaziya umanyano weMDC Alliance, akumelanga kwenzakale kubandla leMDC-T.
Uthe, “Abulunganga ubudlwangudlwangu obenzakale ngeSonto koBulawayo. Asikukhuthazi lokhu. Sizahlolisisa njengebandla sibone ukuthi kuhambe njani njalo silethemba lokuthi labo ababanjiweyo bazajeziwa ngemfanelo ngabakhangelane lezomthetho.
“Ibandla lethu kalihambelani lakho konke lokhu. Kubi kakhulu okwenzakale kuMaKhuphe ongomunye wabakhokhela ibandla leli njalo engumuntu wesizafazana olabantwana. Lokhu kumehlise isithunzi … ngakho-ke ngithi kubi kakhulu …”
UMaKhuphe labanye bakhe abagoqela uMnu. Abednico Bhebhe, obona ngenhlelo kubandla leMDC-T, umgcinisihlalo weMDC-T uMnu. Lovemore Moyo labanye bahlaselwe ngabantu laba ababikwa bevele eHarare ngesikhathi besemhlanganweni weNational Executive Committee kanye leProvincial Executive Committee obungenwe ngamalunga ebandla leli avele eMatabeleland North, Matabeleland South lakoBulawayo.
Intsha engene kulumhlangano ibulele amafasiteli lenye impahla ehofisini le.
Konke lokhu okwenzakeleyo kuthethwe imfinanekiso kamabonakude. Umgcinisihlalo webandla le MDC-T, uMnu. Lovemore Moyo utshele iStudio Seven ukuthi bebesenza umhlangano ohlaselweyo bexoxisana ngodaba lokungena kumanyano.
Ibandla le MDC-T, lithi udlakela olwenzakale koBulawayo alutshengisi simo sebandla osekuyikho okukhulunywa ngabanye.
Sixoxe lomsekeli wesikhulumeli sebandla leli, uNkosazana Thabitha Khumalo othi bazathatha amanyathelo kulabo ababangele ubudlwangudlwangu.