Umongameli Emmerson Mnangagwa utshele umhlangano womanyano wamazwe akuzwekazi le Africa owe SADC Summit eNamibia lamuhla ukuthi ufuna eleZimbabwe lingabheki emuva kodwa liqhubekele phambili ngokuthuthukisa ilizwe kanye lokusebenzelana lamanye amazwe.
Lokhu kwenzakala abakhokheli bamabandla aphikisayo sebekhweze udaba emthethwandaba bephikisa impumela yokhetho lwenyanga edluleyo lapho umongameli Mnangagwa ancinte khona umkhokheli weMDC Alliance uMnu. Nelson Chamisa.
Umongameli Mnangagwa ubonge iziphathamandla zeSADC leze African Union ezazihlola indlela ukhetho obeluqhutshwa ngayo eZimbabwe ngokuvumelana ukuthi belukhululekile lanxa kukhona okumbalwa okufanele kulungiswe.
Umgcinisihlalo weSADC, engumongameli weSouth Africa, uMnu. Cyril Ramaphosa usetshiyela lesi isikhundla omunye wakhe weNamibia uMnu. Hage Genigob.
Ukuhlaziya amazwi kamongameli Mnangagwa, sixoxe loMnu. Albert Mhlanga, isiphathamandla somanyano weMDC Alliance, kodwa ekhuluma ezimele.
UMnu. Mhlanga uthi akufanela umongameli Mnangagwa akhulume kanje yena ekwazi ukuthi umthethwandaba awukethuli isinqumo sokuthi onguye okufanele abengumongameli ngokuqotho ngubani phakathi kwakhe loMnu. Chamisa. Umthethwandaba ulakho njalo ukunquma ukuthi ukhetho luqhutshwe kutsha.
