UMongameli Emmerson Mnangagwa onguye njalo umkhokheli webandla leZanu PF uthi amabandla angekho kunkulumo zomanyano owe POLAD kumele babuye bezomanyana labanye ukuze abonisane ngokunganceda ukuhlenga ele Zimbabwe kunhlupo elibhekane lazo ngoba nxa bengafuni bazaqhubeka bebusa enkundleni zebulenjini eze internet.
Ekhuluma emhlanganweni omkhulu owenziwa kanye ngomnyaka webandla le ZANU PF, owenzelwa eGoromonzi, uMongameli Mnangagwa uveze ukuba ibandla lakhe lizimisele ukulalela izifiso zikazulu kungakho labumba umanyano owe POLAD, omanyanisa inkokheli yamabandla aphikisayo ancintisa kukhetho luka 2018. Kodwa okhokhela ibandla eleMDC Alliance uMnu Nelson Chamisa akekho kulumanyano.
“Njengokuxoxisana,siyabe sixoxisana lababamanye amabandla phansi kwe POLAD, wonke umuntu kaze ku POLAD. Akufuzanga sibangelwe umsindo yilabo ababanga umsindo ku social media, yekelani benze umsindo ku Twitter. Thina siyabe sibusa sibusa sibusa”
Isikhulumeli sabatsha kubandla le MDC uMnu Steven Chuma uthi njengebandla kabawunhloniphi umanyano wePOLAD.
“Kulusizi ukuba uMnu Mnangagwa ufuna singene ku POLAD. Thina siyazi ukuba sanqoba kukhetho ngomnyaka ka 2023. Nxa kulokukhona kuvuze uMnu Mnangagwa abize umuntu ozimeleyo ancedisa ukuba sikhumisane umlotha njebantu abalinganayo”
Ingcitshi ecubungula ezombusazwe uMnu Tafadzwa Chigandiwa uthi uMnangagwa kumele ancenge uChamisa ngoba elabasekeli abanengi njalo kusobala ukuba inkulumo laye ingasiza ukuze ilizwe liphume kunhlupho elibhekane lazo.
“Thina sithi uMongameli uphambanisile akumelanga athi ibandla elingekho ku POLAD liyabusa ku Twitter. Umuntu ngeke abanjwe ngamandla ukuze laye abe kumanyano lo bebambene. Lokhu kwenza abantu belwisane”
Lokhu kusekelwe ngu Mnu Marshal Dube isakhamuzi seHarare, othi iZANU PF sokumele ivume ukuba umanyano wePOLAD kawulancedo uma ibandla le MDC Alliance linganxuswanga.
“Ilizwe le Zimbabwe kufunakala inkulumo, abanye laba abalanto abanganceda ngayo. Kufuze ilizwe libe lenguquko. Kufunakala umuntu ongabahlanganisa ukuze ilizwe libambane”
UMnangagwa uphinde wasola ukutshengisela okwenzakala elizweni esithi lokhu kubisela ilizwe emuva ngoba izithembiso zebandla leli zizafezwa ngokuya kwesikhathi abantu kababekezele. Uveze njalo ukuba imali yakuleli izaqhubeka isebenza kungelani lokuthi isiyehlulekile ukuqeda indubo zokusilela kwemali emabhanga Kanye lokuqonga kwentengo yempahla ezitolo.
