Ugatsha olubona ngezaphakathi kwele South Africa lukhuthaza izizalwane zeZimbabwe ezidinga ingwalo zokuhlala kulelolizwe ukuthi zisebenzise lelithuba eselisele ukulungisisa lezingwalo.
Sokusele insuku ezine kuphela ukuthi uhlelo lukahulumende weSouth Africa lokupha izizalwane zeZimbabwe ingwalo zokuhlala kulelolizwe lugqitshwe.
Isikhulumi salolugatsha uMnumzana Ronnie Mamoepa utshele intathelizindaba ukuthi loluhlelo luzagqitshwa mhlaka 31 ngoMpalakazi njalo alusoze lwedluliselwe phambili.
UBrenda Moyo weStudio 7 ukhulume lonobhala webandla leMDC elikhokhelwa nguMnumzana Arthur Mutambara eSouth Africa uMnumzana Ngqabutho Dube othi ngoMvulo batshone bephathisa labo abangela mapassport ukugcwalisa ama application forms azahanjiswa kuhulumende weSouth Africa, ukuze kwazakale ukuthi bakulelolizwe, njalo bangene kuluhlu lwalabo abadinga ingwalo zokuhlala eSouth Africa.
