UMongameli Joseph Biden uthi kumele amazwe wonke avikele umbuso okhululekileyo ukwenzela ukuba kube lentuthuko emhlabeni wonke jikelele.
Wethule lokhu ngesikhathi evula okusemthethweni umhlangano oweSummit for Democracy, oqoqwe lilizwe leMelika, owokukhuthaza umbuso kazulu.
UBiden utshele abakhokheli bamazwe atshiyeneyo, abenhlanganiso ezizimeleyo labanye abasemhlanganweni lo, oqale namuhla njalo ogqitshwa kusasa, ukuba uyaxega umbuso kazulu emhlabeni wonke jikelele.
“Ngibone kuqakathekile ukuba ngenze umhlangano lo ngoba kukhanya engani kwehla ngamandla emhlabeni wonke jikelele lakwele Melika ukuba lombuso okhululekileyo. Lokhu kuvezwa luphenyo olwenziwe yiFreedom House. Kuqakatheke kakhulu ukuba kube lombuso kazulu emazweni wonke. EMelika siqhubekela phambili sonke isikhathi sizama ukuvuselela umbuso obalulekileyo njalo othakazelelwa ngabantu abanengi. Lokhu kumele sonke sikwenze.”
UBiden uthe ilizwe lakhe selibumbe isikhwama sokuvikela umbuso okhululekileyo emhlabeni wonke jikelele njalo lokulwela amalungelo entathelizindaba ezihlaselwa ngabanye ababusa amazwe ancindezela uzulu.
“Sesilesikhwama esethulwe nguhulumende wami ledale leCongress esilemali edlula izigidi ezingamakhulu amabili ($224 million) ezasetshenziswa ngomnyaka ozayo. Sizabe sizama ukuba kube lombuso okhululekileyo njalo sivuselela imisebenzi yentathelizindaba ngoba umbuso okhululekileyo ubakhona nxa abethula imibiko besebenza bengethuselwa ngababusayo.”
Ekhuluma njalo emhlanganweni lo, uMongameli Hkainde Hichilema wakwele Zambia uthi uthakazelela ukuba abantu sebezibusa elizweni lakhe.
“EleZambia liyathuthuka embusweni. Ngomnyaka lo kube lombuso okhululekileyo. Abantu bonke benze kwaba lombuso okhululekileyo. Bazenzele bona ngesikhathi sokhetho. Bazilwele. Ukunqoba kwethu kwaba ngokwabantu bonke emhlabeni wonke jikelele. Namuhla abantu bakwele Zambia bakhululeke okumangalisayo.
“Akulamuntu wakwele Zambia ozancindezelwa futhi. Sifisa ukuba emhlabeni wonke jikelele kube lokukhululeka. Sizakwenza abantu bethole inotho abayifunayo. Ukukhululeka lokhu yikho okuzakwenza kube lentuthuko emazweni. Asisebenzeni sonke ukuze kube labantu abakhululekileyo.”
Abakhokhela amazwe atshiyeneyo baqhubekela phambili besethula imibiko yayo emhlanganweni lo, owenzelwa ebulenjini beInternet, enkundleni zokuxhumana.
Kulamazwe alitshumi lantathu kuzwekazi leAfrica alabantu abasemhlanganweni lo. EleZimbabwe kalibizwanga nguhulumende kaBiden.
Ingcwethi kwezombusaza ezimeleyo, uMnu. Nhlanhla Moses Ncube, uthi eleZimbabwe kalibizwanga nguBiden ngenxa yokuthi ilizwe kalibuswa ngemfanelo.
Lokhu kusekelwa nguMnu. Kuthula Matshazi, laye oyingcwethi kwezombusazwe ezimeleyo, othi uhulumende kaBiden uvinjwa yimithetho ukuba adlelane lele Zimbabwe.
UMatshazi uthi umbuso obalulekileyo ofiswa ngele Melika ngolandela intando kazulu.
UMnu. Believe Gaule, owebandla leZanu PF, uthi akumangalisi ukuba eleZimbabwe kalibizwanga emhlanganweni lo.
Abasemhlanganweni lo bamele amazwe edlula ikhulu agoqela eleZambia, South Africa, Botswana, Namibia, Democratic Republic of Congo, Botswana, Niger, Nigeria, Liberia, Senegal lamanye.
Abakhokheli abasemhlanganweni oweSummit for Democracy, bakhangelelwe ukuba bazasebenza ngamandla emazweni abo ukwenzela ukuthi kubelombuso kazulu.
