Ibandla leMDC-T leleMDC Alliance asebangisana uMayor weGwanda omutsha.
UMnu Njabulo Siziba ukhethwe ukuba nguMayor walelidolobho izolo kulandela ukuxotshiswa kukaMnu Jaston Mazhale oweMDC Alliance yiMDC-T kaNkosazana Thokozani Khupe.
Ngemva kokunqoba kwakhe ibandla leMDC Alliance lethule umbiko lisithi liyathokoza ngoba lenelise ukuvikela isikhundla salo.
Isikhulumeli salelibandla eMatabeleland South uMnu Ntando Ndlela utshele lumsakazo ukuthi uMnu Siziba ulilunga labo.
Kodwa isikhulumeli seMDC-T uMnu Khaliphani Phugeni yena uthi uSiziba ngoweMDC-T.
UPhugeni utshele iStudio 7 ukuthi uSiziba engavele ethi ungoweMDC Alliance, laye bazamxotsha njengoMazhale labanye.
Asenelisanga ukukhuluma loSiziba ukuze azikhulumele ukuthi umi ngaphi.
Ibandla leMDC-T selixotshise amalunga eMDC Alliance edlula amatshumi amathathu edale lephalamende lakumakhansili.
Olwela amalungelo oluntu njalo ecubungula ezombusazwe uMnu Mbuso Fuzwayo utshele lumsakazo ukuthi kuyadingakala ukuthi iziphathamandla zamabandla la zitshiyane lokulwela izikhundla njalo zimanyane zisebenzele uzulu.