Icele lebandla leMDC-T elikhokhelwa nguMnu. Nelson Chamisa lithi lifuna kuxotshwe ilunga ledale lephalamende uNkosikazi Nomvula Mguni loNkosikazi Thamani Moyo, ukhansila webandla leli omele ilokitshi leLuveve.
Osabambe isikhundla sesikhulumeli sebandla leli, uNkosazana Thabitha Khumalo, uthi uMguni, ongunobhala jikelele webandla leli koBulawayo njalo owangena kudale lephalamende ngalokhu okubizwa ngokuthi yi-proportional representation, loNkosikazi Moyo ongumgcinisihlalo wohlangothi lwabesifazana koBulawayo, betheswa amacala okuthi basekela uNkosazana Thokozani Khupe.
Kodwa-ke, uMnu. Obert Gutu, omele icele lebandla leli elisekela uMaKhupe, owaxotshwa kubandla licele leMDC-T lika Chamisa, uthi bakhuluma ize abathi bafuna ukuxotsha ababili laba njengoba bona beyibo abayinsika yeMDC-T.
UMaKhupe loChamisa balwa okumangalisayo bebanga isikhundla sikamuyi uMorgan Tsvangirai owabulawa yisifo semvukuzane ngoNhlolanja lonyaka.
UChamisa uvunyelwe lidale leNational Council ukuthi athathe isikhundla lesi kodwa uMaKhuphe watshayaphansi ngenduku esithi nguye yedwa owakhethwa nguzulu ngakho-ke kumele akhokhele ibandla leMDC-T kulandela ukubhubhe kuka Tsvangirai.
Ibandla leli selidabuke phakathi ngenxa yokudonselana lokhu.
