Ibandla leMovement for Democratic Change (MDC) elikhokhelwa nguMnu. Nelson Chamisa lithi uhulumende weZimbabwe usefake ibutho okungekho emthethweni emalokitshini ambalwa emadolobheni ngesikhathi kulabantu abafisa ukutshengisela emigwaqweni bekhonona ngesimo esibi somnotho elizweni.
Ibandla leli lithi kuyethusa ukuthi uhulumende wenze lokhu engalandelanga okumunyethwe yisisekelo sombuso welizwe esikubeka sobala ukuthi ibutho kumele livunyelwe lidale lephalamende nxa lizakuya empini kumbe lisenza konke okokuvikela ilizwe leZimbabwe.
“Kusobala ukuthi uhulumende wesaba abantu abafuna ukuzibusa. Ilizwe okwamanje kukhanya selingaphansi kwebutho. Amasotsha asefake amatende emalokitshini kungelasizatho esethulwe nguhulumende njalo kungabikelwanga idale lephalamende njengalokhu okumumethwe yisisekelo sombuso welizwe. Kukhanya engani uhulumende ufuna ukuvimba abantu abafisa ukutshengisela emigwaqweni (bekhonona ngesimo esibi somnotho). Hambe uhulumende webandla leZanu PF usefake lokhu okuthiwa yiState of Emergency na?”
Ibandla leli lithi akukho emthethweni okwenziwa nguhulumende njengoba kusobala ukuthi kwephula ilungelo loluntu.
“Izolo ebusuku amapholisa ensitha abezama ukuvula ngenkani endlini kaMnu. Rashid Mahiya owenhlanganiso yeCrisis Coalition in Zimbabwe. Batshaye umnyango besala ukuziveza. Lokhu akuvunyelwa, kuyinto embi kakhulu.”
Kusanda kubotshwa abantu abayisikhombisa - uStabile Dewa, Farirai Gumbonzvanda, Gamuchirai Makura, George Makoni, Frank Nyasha Mpahlo, Rita Nyamupinga loTatenda Mombeyarara okuthiwa babefuna ukususa uhulumende kaMnangagwa esikhundleni okungekho emthethweni.
“Kuyasihlupha okwenziwa nguhulumende lo okhanya esehluleka ukubusa ngemfanelo. Yikho konke lokhu okwenza ukuthi sikhulume ngenkulumo okumele zenziwe nguhulumende lathi ukwenzela ukuthi kuphumele egcekeni okwenziwa ngesikhathi sokhetho nyakenye kanye lokulungisa okuhluphayo elizweni. Ibandla leZanu PF lingeke lavimba okufiswa nguzulu. Abantu bafuna kubelohulumende obasebenzelayo hatshi obancidezelayo.”
Kasenelisanga ukukhuluma ngodaba lolu labaphathintambo bakahulumende kanye loMnu. George Charamba, isikhulumeli sikaMongameli Mnangagwa.