Lanxa abeZanu PF besithi izijeziso zenotho ezetheswa amalunga ebandla labo kumele zesulwe ngoba zibulala umnotho njalo zilimaza uzulu, abebandla leMDC Alliance bathi umnotho ubulawa yimisebenzi yenkohlakalo lombuso kaMongameli Emmerson Mnangagwa omubi.
Izijeziso lezi zetheswa amalunga eZanu PF lamankampani alobudlelwano lalelibandla yiEuropean Union (EU) leMelika kuminyaka engamatshumi phose amabili edluleyo emizameni yokuphoqa uhulumende ukuthi ahloniphe amalungelo kazulu njalo amise ubudlwangudlwangu obabusenzakala emapulazini ngesikhathi abalimi abamhlophe behluthunelwa umhlabathi.
Abomanyano weEU labeMelika baqina ngokuthi izijeziso lezi ziphazamisa amalunga eZanu PF eziqondiswe kuwo kuphela. Kodwa uhulumende uthi yizo ezibulala umnotho.
“Akula ma-targeted sanctions ngoba abantu abaphezulu ngale abala dubo, udubo lusebantwini abangelalutho phansi abacina bebaleka besiya kwamanye amazwe besiyakuba yizigqili zamakhiwa wonalawa asingcindezelayo,” kutsho ilunga leZanu PF uMnu Believe Gaule.
Amazwi akhe agcizelelwe nguMnu Joseph Tshuma, olilunga leZanu PF Central Committee.
“Ama-sanctions lawa ayalimaza njalo alimaza umkhonomi wethu; ngabe ayasuswa,” kutsho uMnu Tshuma.
“Ezinye ingatsha lamanye ama-organizations ngapha kuSADC asezimisele ukuma leZimbabwe esala into yama-sanctions leyi esithi ngabe ayasuswa ukwenzela ukuthi umkhonomi wethu uthuthuke.”
Inhlanganiso emela osomabhizimusi eyeZimbabwe National Chamber of Commerce (ZNCC) ithi iyawusekela lumkhankaso.
Isiphathamandla salinhlanganiso uMnu Godwin Muoni utshele iphephandaba leHerald ukuthi izijeziso lezi zibulala amabhizimusi ngoba engavunyelwa ukweboleka imali emabhanga aphandle kwelizwe.
Kodwa abebandla eliphikisayo eleMDC Alliance bathi umnotho weZimbabwe udilizwa yiZanu PF ngemisebenzi yenkohlakalo lokwehluleka kukaMongameli Emmerson Mnangagwa ukubusa kuhle.
Ngokunjalo, umsekeli wesikhulumeli seMDC Alliance uMnu Felix Magalela Mafa Sibanda uthi umanyano weSadc udlalisa isikhathi ngokuqoqa umkhankaso wokusola izijeziso kusasa.
“Ama-sanctions akhona ayisiwo eZimbabwe jikelele, abizwa kuthiwa ngama-targeted sanctions.,” kutsho uMnu Sibanda.
“Namhla sibona abantu baphiwa ukudla okuvela kuWorld Food Program, ayisiwo ma-sanctions. Kutshengisa ukuthi iUnited Nation lamanye amabandla alokhe encedisa abantukazana. Bavika ngama-sanctions bona besenza ububi.”
UMafa wengeze wathi nxa uhulumende kaMnangagwa efuna izijeziso zesulwe kumele elandele inkuthazo yeMelika leEuropean Union eyokuthi ahloniphe amalungelo njalo etshiyane lemisebenzi yenkohlakalo.
NgoNkwenkwezi lonyaka, eleMelika likhuphe ibhanga leInfrastructure Development Bank of Zimbabwe leleAgricultural Development Bank of Zimbabwe kuluhlu lwalo lwezijeziso.
Umeli weMelika eZimbabwe uMnu Brian Nichols uthi izijeziso zizasuswa zonke uhulumende engahlonipha amalungelo.
