Kuqhamuke udlakela ngoLwesine eMabvuku eHarare phakathi kwabacatshangelwa ukuthi ngabasekeli bebandla leZANU PF labebandla leMDC elikhokhelwa nguMnu. Morgan Tsvangiria, yena obe bhoda-bhoda ehlolisisa inhlelo ezasungulwa yikhansili yalelidolobho kulindawo.
Abacatshangelwa ukuthi ngabasekeli bebandla leZANU PF babikwa bebegqoke impahla zebandla labo njalo betshayela imota elotshwe ukuthi “ZANU PF Harare Province.” Babonakele bevimba ngamatshe kanye lemigoqo umgwaqo ophambuka koweHarare-Mutare ungena eMabvuku.
UMnu. Tsvangirai ubekhatshwe yiziphathamandla zebandla lakhe ezigoqela amakhansila eMabvuku. Abanye babo babikwa belimele besithi bajikijelwe ngamatshe. Abasekela i-MDC labo babikwa bephathekile kuloludlakela kodwa besithi bayazivikela. I-MDC-T ithi isibike loludaba emapholiseni.
Ekhuluma lentathelizindaba ngemva kwalesisehlakalo, uMnu. Tsvangirai wethese umlandu ibandla leZANU PF ngodlakela osoluqhamuka ezigabeni ezinengi zelizwe. Utshayele ihlombe ikhansili yeHarare ngenhlelo yazo ezokuthuthukisa impilo zabantu.
UKhansila Peter Moyo weHarare, olilunga leMDC-T utshele uSithandekile Mhlanga weStudio 7 ukuthi ibandla leZANU PF alihloniphi ukuthi eleMDC-T yilo elanqobayo kukhetho olwedluleyo kulelidolobho.
